پاکستان مسلم لیگ (ن) کے صدر شہباز شریف سے چیئرمین سینیٹ صادق سنجرانی نے ہفتہ کو ملاقات کی اور باہمی دلچسپی کے امور پر تبادلہ خیال کیا۔ ملاقات کے دوران سنجرانی نے شہباز شریف کو مسلم لیگ ن کی 21 اکتوبر کے جلسے اور اس کے بعد العزیزیہ اور ایون فیلڈ ریفرنسز میں نواز شریف کی اپیلوں کی بحالی پر مبارکباد دی۔
صادق سنجرانی نے مخلوط حکومت کی خدمات کو بھی سراہا۔ چیئرمین سینٹ صادق سنجرانی نے سابق وزیراعظم شہبازشریف سے لاہور میں ان کی رہائش گاہ پر ملاقات کی،
صادق سنجرانی نے اپنے حالیہ دورہ چین کے حوالے سے بھی آگاہ کیا۔ دریں اثناء شہباز شریف سے مسلم لیگ ن خیبرپختونخوا کے صدر امیر مقام نے ملاقات کی۔
ملاقات میں پارٹی کے تنظیمی امور اور آئندہ کی سیاسی سرگرمیوں کے حوالے سے تبادلہ خیال کیا گیا۔ شہباز شریف نے کہا کہ انہیں پارٹی کارکنوں اور رہنماؤں کے جذبے پر فخر ہے۔انہوں نے کہا کہ مسلم لیگ (ن) آئندہ عام انتخابات میں بھرپور جذبے اور عزم کے ساتھ حصہ لے گی۔شہباز شریف نے کہا کہ نواز شریف کی قیادت میں پاکستان کو معاشی طاقت بنائیں گے اور مہنگائی سے نجات دلائیں گے۔سابق وزیراعظم شہباز شریف نے کہا کہ پارٹی کارکنوں اور راہنماﺅں کے جذبے پر فخر ہے، ہمیشہ کی طرح اس بار بھی پاکستان مسلم لیگ (ن) قوم کی امیدوں پر پورا اترے گی۔انہوں نے مزید کہا کہ 21 اکتوبر کے جذبے سے عام انتخابات میں تاریخی عزم سے اتریں گے، نوازشریف کی قیادت میں ملک کو معاشی قوت بنائیں گے، عوام کو مہنگائی سے نجات دلانا ہماری اولین ترجیح ہے۔
Shares:
