شہر اقتدار کی خفاظت کرنے والے خود لٹ گئے، ڈاکو سرکاری پستول بھی لے اڑے

شہر اقتدار میں ڈاکوؤں کے ہاتھوں پولیس افسر لٹ گیا،تھانہ آئی نائن کے علاقہ نیو کٹاریاں قبرستان کے نزدیک مسلح ڈکیتی کی واردات کے دوران موٹر سائیکل سوار دو ملزمان نے وفاقی پولیس کے سب انسپکٹر کو لوٹ لیا۔ملزمان نے مزاحمت پر فائرنگ کرکے پولیس آفیسر کو شدید زخمی کر دیا اور موقع سے فرار ہوگئے۔

واقعہ 28 دسمبر 2020ء سوموار کی صبح ساڑھے چھ کے قریب پیش آیا ۔سب انسپکٹر محمد رفیق پولیس لائنز ہیڈ کوارٹر سے اپنی ڈیوٹی ختم کرکے گھر جارہا تھا۔بتایا گیاہے کہ گولی ان کے پیٹ میں لگی ہے۔

زخمی پولیس آفیسر کو پمز ہسپتال منتقل کرا دیا گیا ہے جہاں ان کی حالت خطرے سے باہر بتائی جاتی ہے۔ ذرائع کا کہنا ہے کہ واردات کے دوران ڈاکو ان سے نقدی کے علاوہ سرکاری پستول بھی چھین کر لے گئے ہیں۔