کپڑے وقت پر نہ دینے پر ایک شہری نے دکاندار کے خلاف عدالت کا دروازہ کھٹکھٹا لیا ہے۔ شہری نے دکاندار سے تنگ آ کر کنزیومر پروٹیکشن کورٹ ساؤتھ میں درخواست دائر کی، جس پر عدالت نے دکان کے مالک کو نوٹس جاری کر دیے ہیں۔
درخواست گزار نے اپنے بیان میں کہا کہ دکان کے مالک نے 20 فروری کو کپڑے تیار کرکے دینے کا وعدہ کیا تھا، تاہم متعدد بار دکان پر جانے کے باوجود وہ کپڑے تیار نہیں کیے گئے۔ شہری کا کہنا تھا کہ بار بار پیچھے کی جانے والی تاریخوں کے باعث اس کی پریشانی بڑھتی گئی اور بالآخر اسے اپنے بھائی کی منگنی کے لیے دوسرا لباس خریدنا پڑا۔درخواست گزار نے عدالت میں استدعا کی کہ دکاندار کا وعدہ پورا نہ کرنے پر 50 ہزار روپے جرمانہ عائد کیا جائے اور اس کے علاوہ ذہنی اذیت کی مد میں مزید 50 ہزار روپے کا جرمانہ بھی کیا جائے۔
عدالت نے دکاندار کو نوٹس جاری کرتے ہوئے کیس کی سماعت کے لیے تاریخ مقرر کر دی ہے۔ اب دیکھنا یہ ہے کہ عدالت اس درخواست پر کیا فیصلہ کرتی ہے اور دکاندار کو اس معاملے میں کتنی سزا ملتی ہے۔
