اسلام آباد: قومی اسمبلی کے حالیہ اجلاس میں پاکستان تحریک انصاف (پی ٹی آئی) کے رکن قومی اسمبلی شیخ وقاص اکرم کی مسلسل غیر حاضری پر سخت کارروائی کا اشارہ دیا گیا ہے۔ اسپیکر قومی اسمبلی ایاز صادق نے بغیر چھٹی کی درخواست دیے مسلسل غیرحاضری پر شیخ وقاص اکرم کو وارننگ دی اور ان کی رکنیت ختم کرنے کا امکان ظاہر کیا۔
اسپیکر نے اجلاس کے دوران کہا کہ شیخ وقاص اکرم گزشتہ 40 دن سے قومی اسمبلی میں بغیر کسی چھٹی کی اجازت کے غیر حاضر ہیں، جو کہ قواعد کے خلاف ہے۔ انہوں نے واضح کیا کہ قواعد کے مطابق اسپیکر غیرحاضری کو نوٹس میں لا کر رکن کی نشست کو خالی قرار دے سکتا ہے۔اس بیان کے بعد تحریک انصاف کے رکن ملک عامر ڈوگر نے اسپیکر کو تنقید کا نشانہ بنایا اور کہا کہ حکومت کی طرف سے ہر سطح پر انہیں روکا جا رہا ہے۔ انہوں نے استدعا کی کہ کوئی بھی رکن اسمبلی چھٹی پر جانے یا چھٹی کی درخواست دینے کی صورت میں اپنی نشست سے محروم نہیں ہوا۔ ملک عامر نے مزید کہا کہ شیخ وقاص اکرم نے بارہا اسپیکر کے دفتر میں چھٹی کی درخواستیں بھیجی ہیں، مگر ان کی درخواستوں پر کوئی کارروائی نہیں ہوئی۔
اس پر اسپیکر ایاز صادق نے جواب دیا کہ پچھلی اسمبلی میں مسلم لیگ (ن) کے رکن محمد میاں سومرو کو بھی غیر حاضری کی بنیاد پر اپنی نشست سے محروم ہونا پڑا تھا، لہٰذا یہ کوئی نئی مثال نہیں ہے۔بعد ازاں مسلم لیگ (ن) کی رکن قومی اسمبلی نوشین افتخار نے شیخ وقاص اکرم کی رکنیت ختم کرنے کی تحریک پیش کی۔ اس پر ڈپٹی اسپیکر نے کہا کہ رولز کے مطابق اس تحریک پر کارروائی کی جائے گی۔
دوسری جانب تحریک انصاف کے رکن قومی اسمبلی شیخ وقاص اکرم نے ردعمل دیتے ہوئے کہا کہ میں نے ہر مرتبہ چھٹی کی درخواست اسپیکر آفس کو جمع کروائی ہے۔ انہوں نے کہا کہ اسپیکر ہی ہاؤس کے کسٹوڈین ہیں اور ان کے پاس درخواستیں موجود ہونی چاہئیں، اگر وہ کہیں تو وہ بتائیں کہ ان کی درخواستیں کہاں گم ہوگئی ہیں۔
