پاکستان تحریک انصاف (پی ٹی آئی) کے رہنما شیر افضل مروت پارٹی کی جانب سے بار بار ملنے والے شوکاز نوٹسز سے تنگ آگئے ہیں۔ انہوں نے اپنے ردعمل کا اظہار پارلیمنٹ ہاؤس کے باہر میڈیا سے گفتگو کرتے ہوئے کیا۔
شیر افضل مروت نے کہا کہ ایک یوٹیوبر نے ان کے بارے میں جو بیان دیا ہے وہ بالکل جھوٹ پر مبنی ہے۔ انہوں نے مزید کہا کہ اگر انہیں پارٹی سے نکالنے کا فیصلہ پہلے ہی کر لیا گیا ہے تو شوکاز نوٹس صرف ایک رسمی کارروائی ہے۔ ان کا کہنا تھا کہ ہر چھ ماہ بعد شوکاز نوٹس آنا معمول بن چکا ہے، حالانکہ ان کا موقف صرف جواب دینے کا ہوتا ہے، بیان دینے کا نہیں۔شیر افضل مروت نے واضح کیا کہ اگر انہیں پارٹی میں رکھا بھی جاتا ہے تو وہ اپنے جوابات دیتے رہیں گے اور کسی بھی شخص کو جو ان کے خلاف بات کرے گا، وہ خاموش نہیں رہیں گے۔ ان کا کہنا تھا کہ "میں جس قبیلے سے ہوں، ہم اپنے مرشد اور لیڈر کے لیے جان دینے کا جذبہ رکھتے ہیں۔”
انہوں نے مزید کہا کہ کچھ افراد پارٹی کے بانی عمران خان کے خلاف غلط بیانی کرتے ہیں اور ان کی آراء کو متاثر کرتے ہیں۔ شیر افضل مروت نے کہا کہ وہ جمعہ کو بیرسٹر گوہر کو اپنے مؤقف سے آگاہ کریں گے۔اس دوران انہوں نے اپنے موقف کو واضح کرتے ہوئے کہا کہ پارٹی کے بعض لوگوں نے ان کے خلاف بیانات دیے جس کا انہوں نے جواب دیا۔ ان کا کہنا تھا کہ وہ سیاست عزت کے لیے کر رہے ہیں اور ان کے گھر کسی کے ہاں سے کھانا نہیں آتا، لہذا وہ کسی کے دباؤ میں نہیں آئیں گے۔شیر افضل مروت نے یہ بھی کہا کہ اگر عمران خان کے سوا کوئی اور شخص ان کے خلاف بات کرے گا تو وہ آئندہ بھی جواب دیں گے۔ وہ شوکاز نوٹسز سے تنگ آ چکے ہیں اور اگر عمران خان نے انہیں نکالنا ہے تو وہ نکال سکتے ہیں کیونکہ ان کے مطابق، انہوں نے کوئی گناہ نہیں کیا۔
بچوں کا غیر محفوظ طریقے سے ختنہ کرنے والے ڈاکٹر کو 5 سال کی سزا
190 ملین پاؤنڈ ریفرنس، فیصلے سے قبل اڈیالہ جیل کی سیکورٹی سخت
