لاہور کے علاقے شیراکوٹ میں 9 سالہ معذور بچی کے ساتھ زیادتی کی کوشش کے افسوسناک واقعے پر وزیراعلیٰ پنجاب مریم نواز شریف کی ہدایت پر چیئرپرسن پنجاب ویمن پروٹیکشن اتھارٹی حنا پرویز بٹ نے متاثرہ بچی کے گھر کا دورہ کیا۔ حنا پرویز بٹ نے بچی کے والد سے ملاقات کر کے واقعے کی تفصیلات معلوم کیں اور متاثرہ بچی کی خیریت دریافت کی۔ انہوں نے یقین دہانی کرائی کہ پنجاب حکومت کی جانب سے متاثرہ خاندان کو مکمل قانونی، طبی اور نفسیاتی مدد فراہم کی جائے گی۔ واقعہ کے مطابق محلے دار محمد اسلم ولد نذر دین نے معذور بچی کے ساتھ چھیڑ چھاڑ اور زیادتی کی کوشش کی۔ پولیس نے فوری کارروائی کرتے ہوئے مقدمہ درج کر کے تفتیش شروع کر دی ہے۔
چیئرپرسن پنجاب ویمن پروٹیکشن اتھارٹی حنا پرویز بٹ نے کہا کہ میں وزیراعلیٰ پنجاب مریم نواز شریف کے وڑن کے مطابق یہ واضح پیغام دینا چاہتی ہوں کہ خواتین اور بچیوں کے ساتھ تشدد یا زیادتی کسی صورت برداشت نہیں کی جائے گی۔ ہر کمزور اور معذور بچی ہمارے تحفظ کی ذمہ داری ہے۔ پولیس کو ہدایت دی ہے کہ ملزم کو جلد از جلد گرفتار کر کے چالان عدالت میں پیش کیا جائے۔ ایسے جرائم کے مرتکبین کسی رعایت کے مستحق نہیں۔ حنا پرویز بٹ نے کہا کہ پنجاب ویمن پروٹیکشن اتھارٹی وزیراعلیٰ پنجاب مریم نواز شریف کے وڑن "خواتین کے لیے محفوظ پنجاب” کے تحت خواتین اور بچیوں کے مکمل تحفظ کے لیے ہمہ وقت سرگرم عمل ہے۔
