بھارتی فلم انڈسٹری کے معروف اور سینیئر فلم ڈائریکٹر شیام بینیگل 90 برس کی عمر میں انتقال کر گئے۔ ان کی بیٹی نے پیر کی شام ہندوستان ٹائمز سے بات کرتے ہوئے والد کے انتقال کی تصدیق کی۔
شیام بینیگل کئی سالوں سے علیل تھے اور طویل عرصے سے گردوں کے عارضے میں مبتلا تھے۔ ان کی صحت مسلسل خراب ہو رہی تھی، جس کے نتیجے میں وہ اس دنیا سے رخصت ہو گئے۔شیام بینیگل کا شمار بھارت کی سینئر اور معیاری فلم ڈائریکٹروں میں ہوتا ہے، جنہوں نے بھارتی سینما کی آرٹ فلموں کی نئی لہر کو متعارف کرایا۔ ان کی بنائی ہوئی فلمیں نہ صرف اپنے وقت کے حوالے سے اہمیت رکھتی ہیں بلکہ آج بھی کلاسک سمجھی جاتی ہیں۔ ان کی مشہور فلموں میں زبیدہ اور منتھن شامل ہیں، جنہوں نے بھارت اور عالمی سطح پر بے شمار ایوارڈز حاصل کیے۔
شیام بینیگل کی شہرت صرف ان کی فلموں کی تخلیق تک محدود نہیں تھی، بلکہ انہوں نے بھارتی سینما میں ایک نئے ڈائریکشن کی بنیاد رکھی تھی جس میں حقیقت پسندی اور معاشرتی موضوعات کو مرکزی حیثیت دی گئی۔ ان کی فلموں میں لوگوں کی حقیقی زندگی، ثقافت، اور مسائل کو بے باکی سے اجاگر کیا گیا تھا۔دریں اثناء، شیام بینیگل نے چند روز قبل ممبئی میں اپنے 90ویں جنم دن کا جشن اپنے اہل خانہ اور قریبی دوستوں کے ساتھ منایا تھا۔ ان کی وفات کے بعد بھارتی فلم انڈسٹری کے مختلف مشہور فنکاروں اور فلم سازوں کی جانب سے افسوس کا اظہار کیا جا رہا ہے۔ کئی اداکاروں نے اپنے سوشل میڈیا اکاؤنٹس پر شیام بینیگل کی خدمات اور ان کے ساتھ گزارے ہوئے لمحات کو یاد کرتے ہوئے خراج عقیدت پیش کیا ہے۔شیام بینیگل کا انتقال بھارتی سینما کے ایک سنہری دور کا خاتمہ ہے، اور ان کی کمی ہمیشہ محسوس کی جائے گی۔ ان کے کام کا اثر آنے والی نسلوں پر ہمیشہ قائم رہے گا۔
