سیالکوٹ،باغی ٹی وی( بیوروچیف شاہد ریاض)ڈپٹی کمشنر سیالکوٹ محمد ذوالقرنین لنگڑیال نے ضلع سیالکوٹ میں 40 روزہ زراعت شماری مہم کا افتتاح کر دیا۔ یہ عمل 10 فروری تک جاری رہے گا۔ قومی اہمیت کے حامل اس عمل کے ذریعے ملک کی زرعی پیداوار، فصلوں کی اقسام، کاشتکاروں کی تعداد اور دیگر اہم زراعت سے متعلق معلومات ڈیجیٹل کاؤنٹ کی جائیں گی۔
ڈپٹی کمشنر محمد ذوالقرنین لنگڑیال نے یوسی پریم نگر میں زراعت شماری کا افتتاح کرتے ہوئے کہا کہ زراعت شماری کے ذریعے حکومت کو ملک کی زراعت کے حوالے سے درست اور جامع معلومات حاصل ہوں گی، جس سے مستقبل میں زرعی پالیسیوں کو مزید بہتر بنایا جا سکے گا۔
زراعت شماری ملک کی معیشت میں زراعت کے کردار کو سمجھنے کے لیے انتہائی اہم ہے۔ اس کے ذریعے حاصل ہونے والی معلومات سے زرعی پیداوار میں اضافے کے لیے حکمت عملی بنائی جا سکتی ہے، کسانوں کو بہتر سہولتیں فراہم کی جا سکتی ہیں، زرعی قرضوں کی تقسیم میں مدد مل سکتی ہے، اور مارکیٹنگ کی حکمت عملیوں کو بہتر بنایا جا سکے گا۔ اس کے علاوہ فوڈ سکیورٹی کو یقینی بنانے میں بھی مدد ملے گی۔
تمام کسانوں سے اپیل کی جاتی ہے کہ وہ زراعت شماری میں بھرپور تعاون کریں اور شماری کارکنوں کو درست معلومات فراہم کریں۔ آپ کی فراہم کردہ معلومات ملک کی زراعت کی بہتری کے لیے انتہائی اہم ہیں۔
حکومت نے زراعت شماری کو کامیاب بنانے کے لیے خصوصی اقدامات اٹھائے ہیں۔ اس سلسلے میں شماری کارکنوں کو تربیت دی گئی اور انہیں جدید آلات فراہم کیے جا رہے ہیں۔ حکومت کا مقصد یہ ہے کہ زراعت شماری کو شفاف اور بروقت طریقے سے مکمل کیا جائے۔ زراعت شماری کے اس مرحلے میں ضلع سیالکوٹ کے 159 بلاک میں زراعت شماری کے لیے کل 12 ٹیمیں تشکیل دی گئی ہیں۔
