سیالکوٹ (باغی ٹی وی،وقاص اسلم کی رپورٹ) تحصیل ڈسکہ کے گاؤں مرہانہ سے تعلق رکھنے والے ہونہار نوجوان عابد محمود نے علامہ اقبال اوپن یونیورسٹی کے کنووکیشن 2025 میں ایم ایڈ (اسپیشل ایجوکیشن) پروگرام میں فرسٹ پوزیشن حاصل کر کے گولڈ میڈل جیت لیا۔ یونیورسٹی کی جانب سے جاری کردہ Merit Certificate بھی انہیں پیش کیا گیا، جو ان کی غیر معمولی تعلیمی کارکردگی کا ثبوت ہے۔
عابد محمود نے اپنی محنت، لگن اور مسلسل جدوجہد سے یہ نمایاں کامیابی حاصل کی، جس پر علاقے میں خوشی کی لہر دوڑ گئی ہے۔ اساتذہ کا کہنا ہے کہ عابد محمود نے دورانِ تعلیم ہمیشہ بہترین کارکردگی دکھائی اور مشکل حالات کے باوجود اپنی تعلیم جاری رکھی۔
اہلِ علاقہ نے اس کامیابی کو مرہانہ گاؤں کے نوجوانوں کے لیے ایک روشن مثال قرار دیا ہے۔ عابد محمود کا کہنا تھا: "یہ کامیابی اللہ کے فضل، والدین کی دعاؤں، اور اساتذہ کی محنت کا نتیجہ ہے۔ میرا خواب ہے کہ میں اسپیشل ایجوکیشن کے شعبے میں ایسے بچوں کے لیے کام کروں جنہیں معاشرے میں خصوصی توجہ کی ضرورت ہوتی ہے۔”
مرہانہ گاؤں، ڈسکہ اور سیالکوٹ کے سماجی و تعلیمی حلقوں نے عابد محمود کو دل کی گہرائیوں سے مبارکباد پیش کی اور ان کے روشن مستقبل کے لیے نیک خواہشات کا اظہار کیا۔
