سیالکوٹ ،باغی ٹی وی(بیوروچیف شاہدریاض) ڈی پی او سیالکوٹ رانا عمر فاروق نے نئے سال کے موقع پر ہلڑ بازی، ہوائی فائرنگ، ون ویلنگ اور آتش بازی کرنے والوں کے خلاف سخت قانونی کارروائی کا اعلان کیا ہے۔ انہوں نے کہا کہ غیر قانونی حرکات نہ صرف قانون شکنی ہیں بلکہ انسانی جانوں کے لیے خطرہ بھی بن سکتی ہیں۔
ڈی پی او کے احکامات پر تھانہ رنگپورہ کے ایس ایچ او سب انسپکٹر محمد سرمد فیاض نے گشت کے دوران سخت اقدامات اٹھانے کا عندیہ دیا ہے۔ انہوں نے کہا کہ ہوائی فائرنگ یا دیگر غیر قانونی افعال سے اجتناب کریں، بصورت دیگر فوری گرفتاری اور مقدمہ درج کیا جائے گا۔
ایس ایچ او محمد سرمد فیاض نے شہریوں سے اپیل کی ہے کہ وہ پولیس کے ساتھ تعاون کریں اور کسی بھی غیر قانونی سرگرمی کی اطلاع دیں۔ انہوں نے مزید کہا کہ عوام کے تعاون کے بغیر ان مسائل پر قابو پانا ممکن نہیں۔ اگر کسی پولیس اہلکار کی جانب سے شہریوں کو بلاوجہ تنگ کیا گیا تو اس کے خلاف بھی کارروائی کی جائے گی۔
تھانہ رنگپورہ کی حدود میں ناکہ بندی کے ساتھ ساتھ عوامی آگاہی مہم جاری ہے تاکہ تمام شہری سال نو کی خوشیاں محفوظ اور پرامن انداز میں منائیں۔
