سیالکوٹ :میونسپل کارپوریشن کا رات گئے تجاوزات مافیا کے خلاف آپریشن

سیالکوٹ ، باغی ٹی وی (بیوروچیف شاہد ریاض) میونسپل کارپوریشن سیالکوٹ کا رات گئے تجاوزات مافیا کے خلاف آپریشن، لہائی بازار، گندم منڈی ، گڑ منڈی، امام صاحب روڈ اور نیکاپورہ پل ایک پر تجاوزات کو ہٹا دیا گیا، لہائی بازار میں تجاوزات مافیا کی ہلڑ بازی ،تہہ بازاری وین کا شیشہ توڑ نے پر 3 افرادکے خلاف تھانہ کوتوالی میں مقدمہ درج کرکے گرفتار کرلیا گیا۔

وزیر اعلی پنجاب مریم نواز شریف کی ہدایت کے مطابق سڑکوں اور بازاروں کو ہر قسم کی تجاوزات سے پاک کرنے کیلئے ڈسٹرکٹ ایڈمنسٹریشن کی زیر نگرانی مہم کامیابی سے جاری ہے۔

ایم او ریگولیشن میونسپل کارپوریشن سیالکوٹ رانا ثقلین محمود نے بتایا کہ تجاوزات کنندگان کو از خود تجاوزات کے خاتمہ کیلئے نوٹس اور وارننگ جاری کی گئیں تھیں۔ انہوں نے کہا کہ تجاوزات قابل گرفت فوجداری جرم ہے جس میں جرمانے اور قید کے علاوہ تجاوزات کو مسمار کیا جاسکتا ہے۔

انہوں نے کہا کہ دکان اپنا سامان دکانوں کی حدود کے اندر رکھیں اور ریڑھی بان پھیری لگا کر سامان فروخت کریں ایک ہی جگہ پر روڈ بند کر کے کسی کو کاروبار کرنے کی اجازت نہیں دی جائے گی۔ بصورت دیگر بلا امتیاز سخت قانونی کارروائی عمل میں لائی جائے گی ۔