سیالکوٹ ( باغی ٹی وی،بیوروچیف شاہد ریاض)سیالکوٹ کے علاقے شہاب پورہ میں واقع ایک نجی سنوکر کلب اُس وقت ہنگامہ خیز منظر کا گواہ بن گیا جب ایک بپھرا ہوا بیل اچانک سنوکر کھیلتے کھلاڑیوں کے درمیان جا گھسا۔ سنوکر کی کیو پکڑے کھلاڑی ایک لمحے میں کلب چھوڑ کر دروازوں اور دیواروں کی طرف دوڑ پڑے، اور دیکھتے ہی دیکھتے کلب میدان جنگ بن گیا۔
بیل کی غیر متوقع "انٹری” پر کلب میں افرا تفری مچ گئی۔ سنوکر ٹیبلز کے گرد دوڑتے کھلاڑیوں کی ویڈیوز سوشل میڈیا پر بھی تیزی سے وائرل ہو گئیں، جس میں سنوکر کے بجائے کھلاڑیوں کو اپنی جان بچاتے ہوئے دوڑ لگاتے دیکھا جا سکتا ہے۔
مقامی افراد کے مطابق بیل قریبی گلی سے بھاگتا ہوا کلب میں داخل ہوا اور چند لمحے وہاں موجود رہا، مگر خوش قسمتی سے کوئی جانی نقصان نہیں ہوا۔ واقعہ نے سنوکر کے سنجیدہ ماحول کو ایک لمحے میں مزاحیہ اور سنسنی خیز منظر میں بدل دیا، اور کھلاڑیوں کو نہ صرف پسینے میں نہلا دیا بلکہ یادگار لمحہ بھی دے گیا۔
