سیالکوٹ (باغی ٹی وی بیوروچیف شاہد ریاض) چیئرمین پنجاب لینڈ ریکارڈ اتھارٹی، چودھری طارق سبحانی نے کہا ہے کہ وزیر اعلیٰ پنجاب مریم نواز شریف کے ویژن کے تحت "ستھرا پنجاب پروگرام” کے تحت ضلع سیالکوٹ کے 1,485 دیہات میں باقاعدگی سے صفائی کی جا رہی ہے۔ اس پروگرام کا فیز فائیو کامیابی سے جاری ہے اور اب تک مجموعی طور پر 3 لاکھ 45 ہزار 476 صفائی، ویسٹ لفٹنگ اور ڈمپنگ کی سرگرمیاں انجام دی جا چکی ہیں۔ ان خیالات کا اظہار انہوں نے ڈپٹی کمشنر سیالکوٹ محمد ذوالقرنین لنگڑیال کے ہمراہ ضلع میں پروگرام کی کارکردگی کا جائزہ لیتے ہوئے کیا۔
اجلاس میں ڈائریکٹر لوکل گورنمنٹ عمر امجد بیگ، ایکسئین سروسز ضلع کونسل محمد ریاض، سینئر آپریشن مینیجر ایس ڈبلیو ایم سی مجاہد رسول، اور ایڈمن آفیسر فہد جاوید بھی موجود تھے۔ ڈپٹی کمشنر محمد ذوالقرنین لنگڑیال نے بتایا کہ ایس ڈبلیو ایم سی کی زیر نگرانی ضلع کی 119 دیہی یونین کونسلز میں صفائی کا فیز فائیو جاری ہے، جس میں 357 سینٹری ورکرز اور 119 لوڈر رکشہ جات استعمال کیے جا رہے ہیں۔ ہر گاؤں میں عارضی سالڈ ویسٹ کلیکشن پوائنٹ سے کوڑا کرکٹ ہیوی مشینری کے ذریعے لینڈ فل سائیٹ پر منتقل کیا جاتا ہے۔
ڈپٹی کمشنر نے مزید بتایا کہ فیز فائیو 12 نومبر رات 12 بجے مکمل ہو جائے گا، جس کے بعد 13 نومبر کو سیالکوٹ سالڈ ویسٹ مینجمنٹ کمپنی ضلع کی چاروں تحصیلوں میں صفائی کی ذمہ داریاں سنبھال لے گی۔ یکم ستمبر سے شروع ہونے والے اس پروگرام کے تحت 58 دیہی یونین کونسلز میں تقریباً 1,400 رورڑیوں (بلک ویسٹ) کو اٹھایا گیا ہے اور 23 ہزار ٹن سے زائد ویسٹ کو لفٹ کیا گیا۔
چودھری طارق سبحانی نے ایس ڈبلیو ایم سی حکام کو ہدایت کی کہ 13 نومبر کو ورکس فورس کے ساتھ فلڈ آپریشن شروع کریں اور صفائی کے مربوط نظام کو سائنٹیفک بنیادوں پر مزید بہتر بنائیں۔
