ڈاکٹرغلام مصطفی بڈانی
سیالکوٹ (باغی ٹی وی، بیوروچیف شاہد ریاض) وزیر دفاع خواجہ محمد آصف نے پاک بھارت حالیہ کشیدگی کے دوران زخمی ہونے والے پاک فوج کے جوانوں کی سی ایم ایچ سیالکوٹ میں عیادت کی۔ ان کے ہمراہ جی او سی 15 ڈویژن میجر جنرل عمران خان بابر بھی موجود تھے۔ وزیر دفاع کو زیر علاج جوانوں کی صحت اور علاج کی صورتحال پر بریفنگ دی گئی۔
خواجہ آصف نے زخمی سپاہیوں کے حوصلے کو سراہتے ہوئے کہا کہ ان کی قربانیاں وطن کے تحفظ کا نشان ہیں۔ میڈیا سے گفتگو کرتے ہوئے ان کا کہنا تھا، "میرے لیے یہ اعزاز کی بات ہے کہ میں ان بہادر جوانوں کے پاس آیا ہوں جو وطن کے دفاع میں زخمی ہوئے۔”
انہوں نے بتایا کہ دشمن نے ہماری ایک چیک پوسٹ پر سو سے زائد گولے برسائے مگر ہمارے جوان ثابت قدم رہے اور آج بھی وطن کے لیے لڑنے کا جذبہ رکھتے ہیں۔ خواجہ آصف نے کہا، "اگر بھارت نے دوبارہ کسی جارحیت کی کوشش کی تو اسے بھرپور جواب دیا جائے گا۔”
وزیر دفاع نے مزید کہا کہ حملے سے قبل سپہ سالار نے خود فجر کی نماز کی امامت کی، جو قومی جذبے اور روحانیت کا مظہر تھا۔ ان کا کہنا تھا کہ تینوں مسلح افواج کے سپہ سالاروں کی حب الوطنی اور قیادت لازوال ہے اور پوری قوم فوج کے ساتھ سیسہ پلائی دیوار بن کر کھڑی ہے۔
