سیالکوٹ، باغی ٹی وی (بیوروچیف شاہد ریاض) پارلیمانی سیکرٹری سوشل ویلفیئر و بیت المال پنجاب، رکن صوبائی اسمبلی چوہدری ارشد جاوید وڑائچ نے کہا ہے کہ روزہ تزکیہ نفس ہے، روزہ رکھنے سے انسان کا ظاہر اور باطن پاک و صاف ہو جاتا ہے۔ یہ مہینہ اس لحاظ سے بھی باعث برکت ہے کہ اسی ماہ مقدس میں قرآن کریم کا نزول بھی ہوا۔
انہوں نے یہ بات علامہ اقبال میموریل ٹیچنگ ہسپتال سیالکوٹ میں سحری و افطاری کے انتظامات کا جائزہ لینے کے دوران میڈیا سے گفتگو کرتے ہوئے کہی۔
چوہدری ارشد جاوید وڑائچ نے کہا کہ اتباع رسول صلی اللہ علیہ وآلہ وسلم میں ہی دونوں جہانوں کی کامیابی مضمر ہے۔ اگر ہم اپنی زندگیاں اللہ تعالیٰ کے محبوب صلی اللہ علیہ وآلہ وسلم کے بتائے ہوئے سنہری اصولوں کے مطابق گزاریں تو دنیا و آخرت میں کامیابی ہمارا مقدر ٹھہرے گی اور ہمارا شمار اللہ تعالیٰ کے انعام یافتہ بندوں میں ہو جائے گا۔
پارلیمانی سیکرٹری سوشل ویلفیئر و بیت المال پنجاب کا مزید کہنا تھا کہ ماہ صیام نیکیوں کی لوٹ سیل کا مہینہ ہے جس میں نفل کا ثواب فرض اور فرض کا ثواب ستر گنا بڑھا دیا جاتا ہے۔ ہمیں اس سے فائدہ اٹھانا چاہیے اور نیک اعمال کے ساتھ ساتھ اپنے ارد گرد غریب اور مستحق لوگوں کا بھی خیال رکھنا چاہیے۔
