سیالکوٹ (باغی ٹی وی، بیوروچیف شاہد ریاض) ایف آئی اے امیگریشن سیالکوٹ نے جعلی دستاویزات پر سفر کرنے والے دو مسافروں کو گرفتار کر لیا۔ گرفتار کیے گئے مسافروں کی شناخت اسد خالد اور زین العابدین کے نام سے ہوئی ہے۔
پہلی کارروائی میں ملزم اسد خالد کو گرفتار کیا گیا، جو مصر سے فلائٹ نمبر G9552 کے ذریعے سیالکوٹ ائرپورٹ پہنچا تھا۔ مصری حکام نے اسد خالد کا پاسپورٹ جعلی ویزے کی وجہ سے ضبط کر لیا تھا۔ ابتدائی تفصیلات کے مطابق ملزم اسد خالد گزشتہ 14 سال سے سعودی عرب میں مقیم تھا اور اس نے منڈی بہاؤالدین سے تعلق رکھنے والے ایک ایجنٹ عمران سے یونان کا جعلی ویزہ حاصل کیا تھا۔ اس مقصد کے لیے اسد خالد نے ایجنٹ کو 10 ہزار سعودی ریال ادا کیے۔ ملزم نے جعلی ویزہ پر القسیم ائرپورٹ سے یونان سفر کرنے کی کوشش کی تاہم مصری حکام نے جعلی ویزہ ثابت ہونے پر اسے 15 دن کی قید کے بعد پاکستان ڈی پورٹ کر دیا۔
دوسری کارروائی میں ایف آئی اے نے زین العابدین کو گرفتار کیا، جو دبئی سے فلائٹ نمبر FZ 337 کے ذریعے سیالکوٹ ائرپورٹ پہنچا تھا۔ زین العابدین نے البانیہ کا جعلی ویزہ حاصل کیا تھا جس کی قیمت 30 لاکھ روپے بتائی گئی۔ ملزم نے یہ ویزہ گوجرانوالہ کے رہائشی ایجنٹ، ملک سکندر، سے حاصل کیا تھا۔ زین العابدین نے سیالکوٹ سے آذربائیجان کا سفر کیا، جہاں ایجنٹ نے اسے جعلی ویزہ فراہم کیا اور اسے البانیہ بذریعہ دبئی بھیجنے کی کوشش کی۔ دبئی ائرپورٹ حکام نے زین العابدین کو روک کر پاکستان ڈی پورٹ کر دیا۔
گرفتار کیے گئے دونوں ملزمان کو مزید قانونی کارروائی کے لیے انسدادِ انسانی سمگلنگ سرکل گوجرانوالہ منتقل کر دیا گیا ہے۔ ایف آئی اے کے مطابق انسانی سمگلنگ کے خلاف کارروائیاں جاری رہیں گی تاکہ جعلی دستاویزات کے ذریعے غیر قانونی سفر کو روکا جا سکے۔
