ڈاکٹرغلام مصطفی بڈانی
سیالکوٹ (باغی ٹی وی، بیورو چیف شاہد ریاض) ایف آئی اے امیگریشن اور انسدادِ انسانی سمگلنگ سرکل کی کارروائیوں میں چار ملزمان گرفتار ہوئے۔ سیالکوٹ انٹرنیشنل ایئرپورٹ پر ایف آئی اے نے گداگری اور قتل کے مقدمے میں نامزد دو مسافروں کو گرفتار کیا۔ واحد بخش اور محمد نعیم کے نام سے شناخت ہونے والے ملزمان میں واحد بخش پرواز نمبر FZ 337 کے ذریعے مسقط سے سیالکوٹ پہنچا تھا۔ اس کی معلومات آئی بی ایم سسٹم پر ہٹ ہوئیں، جس کے بعد معلوم ہوا کہ وہ سعودی عرب سے بھیک مانگنے پر ڈی پورٹ کیا گیا تھا۔ ملزم کو مزید قانونی کارروائی کے لیے انسدادِ انسانی سمگلنگ سرکل گوجرانوالہ منتقل کر دیا گیا۔ محمد نعیم پنجاب پولیس کو قتل کے مقدمے میں مطلوب تھا اور اس کا نام اسٹاپ لسٹ میں شامل تھا۔ ملزم کو تھانہ ککرالی ضلع گجرات میں قتل کے مقدمے میں گرفتار کر لیا گیا۔
دوسری جانب، ایف آئی اے نے ویزہ فراڈ اور انسانی سمگلنگ کے خلاف بھی بڑی کارروائی کی۔ دو ملزمان طلحہ حمید اور صابر علی کو گرفتار کیا گیا، جو بیرون ملک ملازمت کے جھانسے دے کر شہریوں سے لاکھوں روپے بٹورنے میں ملوث تھے۔ طلحہ حمید کو پسرور کے محلہ امام صاحب سے گرفتار کیا گیا، جہاں اس نے شہری سے روس کے لیے 13 لاکھ روپے وصول کیے، مگر شہری کو آذربائیجان بھجوا دیا۔ اسی طرح صابر علی کو احمد پور سیال جھنگ سے گرفتار کیا گیا، جس نے عراق میں ملازمت کا جھانسہ دے کر 11 لاکھ 60 ہزار روپے وصول کیے، لیکن شہریوں کو بیرون ملک بھجوانے میں ناکام رہا۔ ملزمان سے تفتیش جاری ہے اور انہیں مزید قانونی کارروائی کے لیے حراست میں لے لیا گیا ہے۔
