سیالکوٹ (باغی ٹی وی) سیالکوٹ میں غیر قانونی قبضہ مافیا اور تجاوزات کے خلاف ڈپٹی کمشنر محمد ذوالقرنین کی ہدایت پر ضلع کونسل کا کریک ڈاؤن جاری ہے۔ اس سلسلے میں اڈہ کھرانہ گنکرہ روڈ پر غیر قانونی دکانوں کو مسمار کرکے اراضی واگذار کروالی گئی ہے۔
ڈی او ریگولیشن ضلع کونسل رانا ثقلین محمود کے مطابق، قبضہ مافیا نے جامع مسجد کی جگہ پر غیر قانونی دکانیں تعمیر کر رکھی تھیں، جو اب ڈپٹی کمشنر کی ہدایت پر مسمار کر دی گئی ہیں اور مسجد کی زمین کو واپس حاصل کر لیا گیا ہے۔
رانا ثقلین نے مزید بتایا کہ وزیر اعلیٰ پنجاب کی ہدایت کے مطابق ضلع کونسل سیالکوٹ تجاوزات کے خاتمے کے لیے پوری طرح متحرک ہے اور روڈز سے عارضی اور مستقل تجاوزات کو ہٹانے کے لیے بلا امتیاز کارروائیاں کی جا رہی ہیں۔ اس سلسلے میں کسی سے کوئی رعایت نہیں برتی جائے گی۔
علاقہ مکینوں نے مسجد کی زمین کو واگذار کروانے پر وزیر اعلیٰ پنجاب اور ضلعی انتظامیہ کا شکریہ ادا کیا اور تجاوزات کے مکمل خاتمے کے لیے مہم جاری رکھنے کا مطالبہ کیا ہے۔
