سیالکوٹ(باغی ٹی وی بیورو چیف شاہد ریاض) محسن مرے کالج شیخ بشارت اقبال کا تاریخی مولوی میر حسن ہال کی بحالی کا منصوبہ
امریکہ میں مقیم ممتاز پاکستانی بزنس مین شیخ بشارت اقبال نے سیالکوٹ کے گورنمنٹ مرے کالج میں تاریخی مولوی میر حسن ہال کی بحالی کا کام مکمل کرکے اسے دوبارہ کھول دیا۔ یہ ہال مفکر پاکستان حضرت علامہ اقبالؒ کے استاد محترم مولوی میر حسن سے منسوب ہے اور اس کی بحالی پر 35 ملین روپے خرچ کیے گئے ہیں۔
مولوی میر حسن ہال کی بحالی کے بعد منعقدہ تقریب کے مہمان خصوصی ڈپٹی سیکرٹری ہائر ایجوکیشن رضوان الحق تھے، جبکہ دیگر نمایاں شخصیات میں وائس چانسلر پروفیسر ڈاکٹر شازیہ بشیر، ڈائریکٹر کالجز ڈاکٹر امان اللہ راٹھور، اور پروجیکٹ ڈائریکٹر سید عابد شیرازی شامل تھے۔ تقریب میں شیخ بشارت اقبال اور ان کی اہلیہ نے خصوصی شرکت کی۔
شیخ بشارت اقبال نے کہا کہ وہ اپنی دولت عوام اور اپنے مادر علمی پر خرچ کرکے سکون محسوس کرتے ہیں۔ ان کا مقصد سیالکوٹ کی تاریخی اہمیت کو محفوظ کرنا اور نوجوان نسل کو بہترین سہولتیں فراہم کرنا ہے۔
یہ ہال وہی جگہ ہے جہاں 30 اپریل 1944 کو قائداعظم محمد علی جناحؒ نے طلبہ سے خطاب کیا تھا۔ منصوبے کے نگران سید عابد شیرازی کے مطابق ہال کو اس کی اصلی حالت میں بحال کیا گیا ہے۔
تقریب کے اختتام پر شیخ بشارت اقبال کو خصوصی شیلڈ پیش کی گئی، جبکہ دیگر معزز مہمانوں کو بھی یادگاری شیلڈز دی گئیں۔ منصوبے کی تختی کی نقاب کشائی بھی کی گئی۔ اس تقریب میں شہر کی نمایاں شخصیات اور کالج کے اساتذہ نے بڑی تعداد میں شرکت کی۔
شیخ بشارت اقبال نے مرے کالج کے لیے مزید فلاحی منصوبے شروع کرنے کا عندیہ دیا تاکہ طلبہ کو اعلیٰ معیار کی تعلیم اور سہولیات فراہم کی جا سکیں۔
