سیالکوٹ (بیوروچیف شاہدریاض) کوٹلی لوہاراں کے علاقہ میہموجوئیہ میں ایک دلخراش واقعہ پیش آیا جہاں ایک ماں نے مبینہ طور پر اپنے تین بچوں کو زہر دے دیا۔ زہر دینے کی وجہ سے سات سالہ بیٹی ام عمارہ جاں بحق ہو گئی، جبکہ دو بچوں کی حالت تشویشناک ہے۔
پولیس ترجمان کے مطابق، خاتون سدرہ محسن کا بیرون ملک مقیم شوہر سے فون پر جھگڑا ہوا جس کے بعد اس نے اپنے تین بچوں ام عمارہ (7 سال)، محمد غازی (9 سال) اور محمد حمزہ (3 سال) کو زہر دے دیا۔
ام عمارہ زہر کے اثر سے جان کی بازی ہار گئی، جبکہ محمد غازی اور محمد حمزہ کو تشویشناک حالت میں ہسپتال منتقل کیا گیا۔ ایک بچے کی حالت انتہائی نازک بتائی جا رہی ہے۔
پولیس نے بچوں کے چچا کی مدعیت میں ایف آئی آر درج کر لی ہے۔ ملزمہ سدرہ محسن واقعے کے بعد فرار ہو گئی ہے۔ پولیس ملزمہ کی گرفتاری کے لیے مختلف مقامات پر چھاپے مار رہی ہے اور جلد گرفتاری کا دعویٰ کیا ہے۔
