سیالکوٹ (باغی ٹی وی، بیوروچیف شاہد ریاض)ڈسٹرکٹ امن کمیٹی سیالکوٹ کا اہم اجلاس ڈپٹی کمشنر صبا اصغر علی اور ڈسٹرکٹ پولیس آفیسر فیصل شہزاد کی زیر صدارت ڈی سی آفس کانفرنس روم میں منعقد ہوا۔ اجلاس میں محرم الحرام کے دوران امن و امان کی صورتحال، سیکیورٹی اور انتظامی حکمت عملی کا تفصیلی جائزہ لیا گیا۔
ڈپٹی کمشنر اور ڈی پی او نے شرکاء سے خطاب کرتے ہوئے کہا کہ محرم الحرام کے دوران پائیدار امن کا قیام صرف پولیس یا انتظامیہ کا فریضہ نہیں بلکہ علماء کرام، سماجی راہنماؤں اور امن کمیٹی کے اراکین کی مشترکہ ذمہ داری ہے۔ انہوں نے کہا کہ امن کمیٹی کے ممبران جو خالصتاً رضاکارانہ جذبے سے بلا معاوضہ خدمات انجام دے رہے ہیں، وہ قابلِ ستائش ہیں۔
شرکاء سے خطاب میں زور دیا گیا کہ امت مسلمہ اس وقت جس نازک صورتحال سے دوچار ہے، اس تناظر میں بین المسالک ہم آہنگی، اتحاد اور رواداری نہایت ضروری ہے۔ اجلاس میں فیصلہ کیا گیا کہ تمام مکاتب فکر کے قائدین ذاتی مفادات سے بالاتر ہو کر امن و بھائی چارے کیلئے متحرک کردار ادا کریں۔
اجلاس سے ضلع امن کمیٹی کے کوآرڈینیٹر حافظ اصغر علی چیمہ، مفتی کفایت اللہ شاکر، علامہ ایوب خان، قاری اقبال گھمن، ظفر عباس، ایوب اوپل، نجم گیلانی اور حافظ نیاز احمد نے بھی اظہار خیال کیا۔
اجلاس میں اسسٹنٹ کمشنر سیالکوٹ انعم بابر، اے سی ڈسکہ عثمان غنی، اے سی پسرور سدرہ ستار، انچارج سیکیورٹی برانچ حافظ سعید، سی او میونسپل کارپوریشن ملک اعجاز اور سی ایس ڈبلیو ایم سی کاشف نواز رندھاوا سمیت متعلقہ اداروں کے افسران نے بھی شرکت کی۔
