سیالکوٹ (باغی ٹی وی،بیوروچیف شاہدریاض) جماعت اسلامی پاکستان کے نائب امیر ڈاکٹر اسامہ رضی خان نے کہا ہے کہ سول اور ملٹری اسٹیبلشمنٹ نے اپنے مفادات کے لیے کرپٹ سیاستدانوں کے ساتھ مل کر ملک کے سیاسی نظام کو یرغمال بنایا اور عوام کو حقیقی آزادی سے محروم رکھا۔ انہوں نے ان خیالات کا اظہار جماعت اسلامی ضلع سیالکوٹ کے امیر چوہدری امتیاز احمد بریار کی تقریب حلف برداری میں بطور مہمان خصوصی خطاب کرتے ہوئے کیا۔
ڈاکٹر اسامہ رضی نے کہا کہ جماعت اسلامی آئین کو ایک متفقہ دستاویز اور عمرانی معاہدہ سمجھتی ہے، جس کے ساتھ حکومت کا کھیلواڑ انتہائی خطرناک ہے۔ انہوں نے حکومت کو اخلاقی ساکھ سے عاری قرار دیا اور کہا کہ جماعت اسلامی کی بجلی کے بلوں کے خلاف دھرنے اور ممبرشپ مہم نے معاشرے کے مختلف طبقات کو متوجہ کیا ہے۔
تقریب کے دوران جماعت اسلامی ضلع سیالکوٹ کے امیر چوہدری امتیاز احمد بریار نے فلسطین فنڈ کے لیے آٹھ لاکھ روپے پیش کیے اور امیر جماعت اسلامی پاکستان کی جدوجہد کی حمایت کا اعادہ کیا۔ اس موقع پر نمایاں کارکردگی دکھانے والے کارکنوں میں شیلڈز بھی تقسیم کی گئیں۔
