سیالکوٹ ،باغی ٹی وی(بیوروچیف شایدریاض) ڈپٹی کمشنر محمد ذوالقرنین لنگڑیال نے کہا ہے کہ موسمیاتی تبدیلیوں کے باعث سیلاب، طوفانی بارشوں اور دیگر قدرتی آفات کی شدت اور امکانات میں اضافہ ہوا ہے۔ کسی بھی ناگہانی صورتحال سے نمٹنے کے لیے ریسکیو اداروں کو اپنی تیاریوں کو بہتر بنانا ہوگا۔
ڈپٹی کمشنر نے یہ بات ڈسٹرکٹ ڈیزاسٹر مینجمنٹ اتھارٹی اور ڈسٹرکٹ ایمرجنسی بورڈ کے مشترکہ اجلاس سے خطاب کرتے ہوئے کہی۔ انہوں نے ڈی او ایمرجنسی نوید اقبال کو ہدایت کی کہ مون سون سے قبل تحصیل اور ضلع کی سطح پر فل اسکیل آزمائشی مشقوں کا اہتمام کیا جائے تاکہ ریسکیو کی صلاحیت اور مشینری کی کارکردگی کا جائزہ لیا جا سکے۔
مزید برآں، ڈپٹی کمشنر نے سی او ضلع کونسل فدا میر کو خواجہ صفدر روڈ پر خطرناک موڑ پر کیٹ آئیز نصب کرنے اور سمبڑیال ڈرائی پورٹ چوک پر مرر لگانے کی ہدایات جاری کیں۔
سیکرٹری آر ٹی اے اور ٹریفک پولیس کو ٹریفک جام کے مسائل حل کرنے کے لیے بولنگ پوائنٹس کی ری ڈیزائننگ اور ٹریفک قوانین کی خلاف ورزی کے خلاف موثر کارروائی کو یقینی بنانے کا کہا گیا۔
اجلاس میں مختلف محکموں کے افسران نے شرکت کی اور موجودہ صورتحال پر تفصیلی بریفنگ دی۔ ڈپٹی کمشنر نے تمام متعلقہ اداروں کو ہنگامی حالات کے لیے تیار رہنے اور عوام کی جان و مال کے تحفظ کو یقینی بنانے کی ہدایات دیں۔
