سیالکوٹ (ڈسٹرکٹ رپورٹرمدثررتو) سیالکوٹ میں 28 صفر کو شہادت امام حسن علیہ السلام کا مرکزی جلوس امام بارگاہ دربتول، اڈہ پسروریاں سے برآمد ہوا۔
یہ جلوس اڈہ پسروریاں سے شروع ہو کر کشمیری محلہ، بڈھی بازار، بازار کلاں اور دو دروازہ سے ہوتا ہوا رات 9 بجے کے قریب امام بارگاہ دربتول پہنچ کر اختتام پذیر ہوگا۔ جلوس کے راستوں میں شرکاء کے لیے سبیلوں اور لنگر کا خصوصی انتظام کیا گیا ہے۔
جلوس کی سکیورٹی کے لیے فول پروف انتظامات کیے گئے ہیں، جس کے تحت تقریباً 1000 سے زائد پولیس اہلکار تعینات کیے گئے ہیں۔ جلوس کی نگرانی ڈی پی او آفس سے سی سی ٹی وی کیمروں کی مدد سے کی جا رہی ہے۔ جلوس میں داخلے کے لیے تین تہوں پر مشتمل حفاظتی حصار قائم کیا گیا ہے اور مکمل چیکنگ کے بعد ہی داخلے کی اجازت دی جا رہی ہے۔ اس کے علاوہ، جلوس کے داخلی و خارجی راستوں پر خاردار تاریں اور قناتیں بھی لگائی گئی ہیں۔
