سیالکوٹ: ایئرپورٹ سے 28 ہزار درہم کی سمگلنگ ناکام، ملزم گرفتار
سیالکوٹ (باغی ٹی وی، بیوروچیف شاہد ریاض) سمبڑیال سیالکوٹ انٹرنیشنل ایئرپورٹ پر 28 ہزار یو اے ای درہم کی غیر قانونی سمگلنگ کی کوشش ناکام بنا دی گئی۔ دوران چیکنگ انٹی نارکوٹکس فورس نے دبئی جانے والے ایک مسافر کی تلاشی کے دوران یہ کرنسی برآمد کی۔ مشتبہ مسافر کی شناخت محمد ارشد ولد محمد منشاء کے نام سے ہوئی، جو ضلع سیالکوٹ کے قصبہ ہڈالی کا رہائشی ہے۔
مسافر کو ایئرپورٹ پر انٹی نارکوٹکس فورس کے حکام نے مشکوک حرکات کے باعث روک کر تلاشی لی، جس دوران 28 ہزار درہم برآمد ہوئے۔ فوراً کارروائی کرتے ہوئے ملزم کو حراست میں لیا گیا اور برآمد شدہ کرنسی سمیت پاکستان کسٹمز کے حکام کے حوالے کر دیا گیا۔
کسٹمز حکام نے ملزم کو اپنی تحویل میں لے کر محکمانہ کارروائی کا آغاز کر دیا ہے۔ اس کارروائی کو قانونی اور سیکیورٹی اداروں کی جانب سے ایک بڑی کامیابی قرار دیا جا رہا ہے تاکہ غیر قانونی طور پر کرنسی کی سمگلنگ کو روکا جا سکے۔
