سیالکوٹ (باغی ٹی وی بیوروچیف شاہد ریاض) گورنمنٹ کالج ویمن یونیورسٹی سیالکوٹ میں دو روزہ بک فئیر اینڈ لیٹریری فیسٹیول کا پروقار افتتاح ہوا۔ افتتاحی تقریب کے مہمان خصوصی ایم پی اے چوہدری فیصل اکرام، صدر چیمبر آف کامرس اکرام الحق، ایم پی اے و ممبر سینڈیکیٹ شکیلہ آرتھر اور وائس چانسلر پروفیسر ڈاکٹر شازیہ بشیر سمیت دیگر اہم شخصیات نے فیتہ کاٹ کر میلے کا باضابطہ آغاز کیا۔
بک فئیر میں 20 سے زائد نامور پبلشرز نے اپنے اسٹالز لگائے ہیں، جہاں طالبات کو نصابی کتب پر 30 سے 60 فیصد تک خصوصی رعایت دی جا رہی ہے۔ ادبی میلے کے دوران یونیورسٹی کے اساتذہ، سابقہ اور موجودہ طالبات کی تصانیف کی رونمائی بھی کی گئی۔ تقریب کا آغاز طالبات کی جانب سے اسماء الحسنی کی تلاوت سے ہوا۔
ادبی نشست میں معروف مصنفہ اور ادیبہ پروفیسر ڈاکٹر امبرین صلاح الدین نے "خواتین کی اردو شاعری اور ادب” کے موضوع پر ایک جامع گفتگو کی، جسے حاضرین نے بہت پسند کیا۔ اس موقع پر ایم پی اے چوہدری فیصل اکرام نے کتاب دوستی کی اہمیت پر روشنی ڈالتے ہوئے کہا کہ جس طرح دیمک لکڑی کو کھاتی ہے، اسی طرح موبائل فون ہمارے ذہنوں پر منفی اثرات مرتب کر رہے ہیں، جس سے بچنے کا واحد ذریعہ کتابوں سے لگاؤ ہے۔
وائس چانسلر پروفیسر ڈاکٹر شازیہ بشیر نے فیسٹیول کے منتظم پروفیسر ڈاکٹر طارق، لائبریری انچارج نصرت علی اور تمام انتظامی کمیٹی کے ممبران کی کاوشوں کو سراہتے ہوئے کہا کہ اس میلے کا بنیادی مقصد طالبات میں مطالعہ اور علم کی محبت کو فروغ دینا ہے۔ انہوں نے سیالکوٹ کی خواتین اور خاندانوں کو بھی دعوت دی کہ وہ اپنے بچوں کے ہمراہ بک فئیر کا ضرور دورہ کریں۔
اس موقع پر طالبات نے مختلف ذائقہ دار فوڈ اسٹالز بھی لگائے تھے، جس سے تقریب کا ماحول مزید خوشگوار ہو گیا۔ افتتاحی تقریب میں ڈین فیکلٹی آف آرٹس اینڈ سوشل سائنسز پروفیسر ڈاکٹر یاسر نواز منج، ڈین فیکلٹی آف بزنس اینڈ ایڈمنسٹریٹو سائنسز پروفیسر ڈاکٹر الیاس، رجسٹرار اعجاز احمد، کنٹرولر امتحانات ملک گلشان اسلم، ٹریژر پروفیسر ڈاکٹر عدنان عادل اور مختلف شعبہ جات کے سربراہان، اساتذہ، طالبات اور معزز مہمانوں کی کثیر تعداد نے شرکت کی۔
