سیالکوٹ:مزدور کی اجرت کے قانون پر عملدرآمدکیلئے لیبر ڈیپارٹمنٹ اپنی ذمہ داریاں ادا کرے،مظفر مختار

سیالکوٹ،باغی ٹی وی (بیوروچیف شاہد ریاض سے)ایڈیشنل ڈپٹی کمشنر فنانس اینڈ پلاننگ مظفر مختار نے کہا ہے کہ وزیر اعلی پنجاب مریم نواز شریف کی جانب سے مقرر کی گئی مزدور کی کم سے کم اجرت کے قانون پر عملدرآمد کو یقینی بنانے کیلئے لیبر ڈیپارٹمنٹ اپنی ذمہ داریوں کو ادا کرے، فیکٹریوں اور ورکشاپس پر ملازمت کرنے والے مزدوروں اور بالخصوص اینٹوں پر بھٹوں پر کام کرنے والے مزدوروں کو حکومت پنجاب کے حالیہ بجٹ میں طے کردہ اجرت کی ادائیگی مالکان کا قانونی اور اخلاقی فریضہ ہے۔

یہ بات انہوں نے ڈسٹرکٹ ویجی لینس کمیٹی برائے انسداد جبری مشقت و ہیئومین ٹریفکنگ سیالکوٹ کے ممبران کے اجلاس سے خطاب کرتے ہوئے کہی۔ اجلاس میں ڈی ڈی لیبر طیب ورک، ڈی ڈی سوشل ویلفئیر شریف گھمن، اسسٹنٹ ڈائریکٹر پنجاب سوشل محمد شفیق، نمائندہ لٹریسی ڈیپارٹمنٹ کاشف چڈر، انسپکٹر تحفظ ماحولیات احمد یار، لاء آفیسر چائلڈ پروٹیکشن بیورو عارف محمود باجوہ ، نمائندگان سول سوسائٹیز مرزا عبدالشکور اور اشفاق نذر گھمن نے بھی اجلاس میں شرکت کی۔

ایڈیشنل ڈپٹی کمشنر مظفر مختار نے کہا کہ فیکٹریز اور دیگر نجی اداروں میں کام کرنے والے ورکرز کی رجسٹریشن اور ان کو سوشل سیکیورٹیز کارڈز کا اجراء پنجاب ایمپلائز سوشل سیکورٹی ایجنسی کے مقامی حکام کی ذمہ داری ہے۔

انہوں نے اینٹوں کے بھٹوں پر کم سے بچوں سے مزدوری لینے والے بھٹہ مالکان کے خلاف مقدمہ درج کیا جائے گا۔ انہوں نے کہا کہ غیر قانونی طریقے سے بیرون ملک جانے والے نوجوانوں کی کونسلنگ کی جائے اور انسانی اسمگلنگ میں ملوث ایجنٹوں کے خلاف ایف آئی اے کارروائی عمل میں لائے۔