سند ھ حکومت کا تحصیلوں کو ضلعی ہیڈکوارٹرز سے ملانے کے لئے بس سروسز لانے پر غور

سندھ کے سینئر وزیر شرجیل انعام میمن کی زیر صدارت محکمہ ٹرانسپورٹ کا اعلیٰ سطح کا اجلاس ہوا، اجلاس میں سیکرٹری ٹرانسپورٹ اسد ضامن، ایم ڈی ایس ایم ٹی اے کمال دایو اور دیگر نے شرکت کی۔جس میں حکومت سندھ کی جانب سے صوبے بھر کے لئے نئے مالی سال میں مزید بسیں لانے کا فیصلہ کیا گیا ہے۔شرجیل انعام میمن نے کہا کہ شریک چیئرمین بلاول بھٹو زرداری و صدر آصف علی زرداری کا ویژن ہے کہ تحصیلوں کو ضلعی ہیڈکوارٹرز سے ملایا جائے، تحصیلوں کو ضلعی ہیڈکوارٹرز سے ملانے کے لئے پیپلز بس سروس کے تحت سکیم لانے پر غور کر رہے ہیں۔سینئر صوبائی وزیر نے کہا کہ سکھر تا لاڑکانہ اور سکھر تا خیرپور بھی پیپلز بس سروس شروع کی جائے گی۔اس موقع پر بی آر ٹیز، سگنلز، بس ٹرمینلز کی تعمیر نو، پیپلز بس سروس کیلئے یو ٹرن بنانے پر سینئر وزیر شرجیل انعام میمن کو تفصیلی بریفنگ دی گئی۔اجلاس میں حیدرآباد کے مرکزی علاقوں میں ٹریفک کا دباؤ کم کرنے کے لئے پارکنگ پلازہ کی تعمیر کا بھی فیصلہ کیا گیا، اجلاس میں 8 بس ٹرمینلز کا تعمیراتی کام مکمل ہونے کے حوالے سے بھی سینئر وزیر کو بریفنگ دی گئی۔سینئر صوبائی وزیر کو بتایا گیا کہ 8 بس ٹرمینلز کا کام مکمل ہو چکا ہے، جون تک فعال ہو جائیں گے۔