سندھ ہائیکورٹ نے فلم پروڈیوسر، رائٹر اور ڈائریکٹر جمشید محمود المعروف جامی کی سزا معطل کرنے کا حکم دے دیا ہے۔ یہ فیصلہ سندھ ہائیکورٹ میں جمشید محمود کی سزا کے خلاف دائر اپیل کی سماعت کے دوران سنایا گیا۔
عدالت نے جمشید محمود کو ماتحت عدالت کی جانب سے دی گئی سزا معطل کرتے ہوئے ان کی ضمانت منظور کی ہے۔ ضمانت کے بدلے 50 ہزار روپے کے مچلکے جمع کروانے کی شرط رکھی گئی ہے۔ وکیل حافظ محمد یحییٰ ایڈووکیٹ نے میڈیا کو بتایا کہ جمشید محمود کو جلد ہی جیل سے رہا کردیا جائے گا۔
واضح رہے کہ ایڈیشنل سیشن جج کی عدالت نے جمشید محمود کو ڈائریکٹ کمپلینٹ پر دو سال قید اور جرمانے کی سزا سنائی تھی۔ یہ سزا فلم اور میوزک ڈائریکٹر سہیل جاوید کی طرف سے جمشید محمود کے خلاف دائر کی گئی ہتک عزت کی شکایت پر دی گئی تھی۔
معروف فلم پروڈیوسر، رائٹر اور ڈائریکٹر جمشید محمود عرف جامی نے ہتک عزت کے الزام میں دی گئی سزا کے خلاف سندھ ہائیکورٹ میں اپیل دائر کر دی تھی، جمشید محمود نے ہتک عزت کیس میں دی گئی سزا کو غیر منصفانہ قرار دیتے ہوئے موقف اپنایا ہے کہ جس جرم میں سزا سنائی گئی ہے وہ قابل ضمانت ہے اور سزا میں قانونی تقاضے پورے نہیں کیے گئے۔ اپیل میں یہ بھی کہا گیا ہے کہ الزامات غلط اور بے بنیاد ہیں، اس لیے ماتحت عدالت کی جانب سے سنائی گئی سزا کو کالعدم قرار دیا جائے۔
