سندھ کے امن و امان اور رمضان میں عوام کو سستے داموں اشیاء کی فراہمی ہر صورت ممکن بنائی جائے ،مراد علی شاہ

وزیر اعلیٰ سندھ کی زیرصدارت سندھ کابینہ کا آج تعارفی اجلاس ہوا وزیر اعلی سندھ نے کہا کہ عوام نے پاکستان پیپلز پارٹی پر اعتماد کیا ہے۔ سندھ کے عوام نے ہمیں دو تہائی سے بھی زیادہ اکثریت دلوائی ہے۔ انہوں نے کہا کہ ہمارا اور پارٹی لیڈر شپ کا بھی فرض بنتا ہے کہ عوام کی فلاح و بہبود کیلئے بھرپور کام کیا جائے۔ اجلاس میں کمشنر کراچی نے بریفنگ دی۔ کمشنر کراچی کا کہنا تھا کہ ذخیرہ اندوزوں کے خلاف بھرپور کارروائیاں کی جارہی ہیں۔
ترجمان وزیراعلیٰ سندھ کے مطابق وزیراعلیٰ نے ہدایت کی کہ کراچی میں اشیائے خور و نوش کی قیمتوں پر کنٹرول رکھا جائے۔ اس موقع پر آئی جی پولیس نے کابینہ کو امن و امان کی موجودہ صورتحال پر بریفنگ دی۔ بریفنگ میں انہوں نے بتایا کہ چینی کی 123 روپے ہول سیل قیمت اور 130روپے ریٹیل قیمت کو برقرار رکھا ہے۔ وزیر اعلیٰ سندھ نے کہا کہ اسٹریٹ کرائم ہر صورت کنٹرول کیا جائے۔ ترجمان کے مطابق آئی جی نے بریفنگ میں بتایا کہ اسٹریٹ کرمنلز کے خلاف مارچ میں 55 مقابلےکئے، 10 کرمنل مارے گئے۔انکا کہنا تھا کہ جوابدہی ہونے تک امن و امان کی صورتحال میں بہتری نہیں آئے گی۔ بریفنگ میں بتایا گیا کہ اگست 2023 سے مارچ 2024 تک 62.540 کلو گرام آئس کرسٹل/ آئس پکڑی گئی ہے۔ وزیر اعلیٰ سندھ نے کہا جس تھانے کی حدود میں کرائم ہو رہا ہے اُس کا ایس ایچ او اور ایس ایس پی جوابدہ ہوگا۔ آئی جی سندھ کے مطابق گھوٹکی میں اس وقت 6، شکار پور سے 9 اور کشمور سے 14 افراد اغواء ہیں۔ انہوں نے کہا اس وقت سندھ کے اضلاع سے مجموعی طور پر 29 افراد اغواء کئے گئے ہیں۔ وزیر اعلیٰ سندھ نے ہدایت کی کہ مغویوں کی بازیابی کےلیے اقدامات کریں۔
دریں اثنا 22.068 ارب روپے کے رمضان پیکیج کی سندھ کابینہ نے منظوری دے دی۔ ترجمان وزیراعلیٰ سندھ کے مطابق رمضان پیکیج کے تحت 4413584 خاندانوں کو 5000 روپے فی خاندان دیئے جائیں گے۔ ترجمان کے مطابق سندھ کابینہ نے 9 لاکھ ٹن گندم کی خریداری کا ہدف مقرر کر دیا۔ ترجمان کے مطابق اجلاس میں فیصلہ کیا گیا کہ گندم کی خریداری کی قیمت 4000 روپے فی من ہوگی۔ وزیراعلیٰ سندھ نے اس موقع پر محکمہ خوراک کو گندم کی خریداری کیلئے فوری اقدامات کرنے کی ہدایت بھی کی۔