سندھ کے سینئر صوبائی وزیر شرجیل میمن نے کہا ہے کہ دشمن پاکستان کو مضبوط نہیں دیکھنا چاہتے، پیپلزپارٹی نے صوبوں کو خودمختاری دی، بلاول بھٹو نے عالمی سطح پر مودی کو بے نقاب کیا، ہم نے سیلابی صورتحال میں سب سے بڑا رہائشی منصوبہ دیا، سیلاب متاثرین کیلئے 21 لاکھ گھر بنا رہے ہیں۔
شرجیل انعام میمن نے کراچی میں پریس کانفرنس کرتے ہوئے کہا ہے کہ آصف زرداری نے پاکستان کھپے کا نعرہ لگاکر سب کو متحد کیا، پیپلزپارٹی نے ہمیشہ اداروں کو مضبوط کرنے کی بات کی، پیپلزپارٹی نے جیلوں میں جاکر بھی بیانیہ نہیں بدلا، پیپلزپارٹی نے صوبوں کو خودمختاری دی، دیگر جماعتوں کا مؤقف مختلف اوقات میں تبدیل ہوتا رہا ہے۔ان کا کہنا ہے کہ ابھی نندن کو عزت سے بھیجنا بھارتیوں کے منہ پر طمانچہ تھا، ہماری فورسز نے بھارت کو عبرتناک شکست دی، پوری دنیا میں بھارت کی رسوائی ہوئی، سندھ قیامت تک پاکستان کا حصہ رہے گا، پیپلزپارٹی کبھی کسی سازش کا حصہ نہیں رہی، کسی کو صوبہ بنانے کا شوق ہے تو آئین کے مطابق کوشش کرلے۔
شرجیل میمن نے مزید کہا کہ بانی پی ٹی آئی ڈھائی 3 سال کی جیل پر ملک دشمنوں سے مدد مانگ رہے ہیں، پی ٹی آئی گھر کی بات گھر میں رکھے، اداروں کو متنازع نہ بنائیں، پی ٹی آئی والے ملک دشمنوں سے مدد نہ مانگیں، پی ٹی آئی والے اپنی لڑائی عدالتوں میں لڑیں۔
