سیالکوٹ(باغی ٹی وی،بیوروچیٍف شاہد ریاض)ڈپٹی کمشنر کا گورنمنٹ گرلز اسلامیہ ہائی سکول میں سولر سسٹم کا افتتاح،طالبات میں تدریسی سامان کی تقسیم
سیالکوٹ میں ڈپٹی کمشنر محمد ذوالقرنین لنگڑیال نے گورنمنٹ گرلز اسلامیہ ہائی سکول میں 8 میگاواٹ کے سولر پینل سسٹم کا افتتاح کیا اور طالبات میں اسکول یونیفارم، جوتے، اور تدریسی سامان تقسیم کیا۔ اس موقع پر ایک پروقار تقریب منعقد کی گئی، جہاں طالبات کی جانب سے تلاوت، نعت، ملی نغمے، اور ٹیبلو پیش کیے گئے۔ ڈپٹی کمشنر نے طالبات اور اساتذہ کی محنت کو سراہتے ہوئے کہا کہ طالبات اپنی توجہ تعلیم پر مرکوز رکھیں اور صبر و نظم و ضبط کے ساتھ کامیابی کی راہ ہموار کریں۔
انہوں نے اساتذہ پر زور دیا کہ وہ بچوں کو زیورِ تعلیم سے آراستہ کرنے کے ساتھ ان کی کردار سازی پر بھی توجہ دیں تاکہ وہ معاشرے کے مفید شہری بن سکیں۔ تقریب میں سکول کونسل کی جانب سے لگائے گئے سولر سسٹم کی افادیت کو بھی اجاگر کیا گیا، جو تعلیمی ماحول کو بہتر بنانے میں مددگار ثابت ہوگا۔
تقریب کے اختتام پر 75 طالبات کو یونیفارم، جوتے اور دیگر تدریسی سامان فراہم کیا گیا، جس پر طالبات اور والدین نے انتظامیہ کا شکریہ ادا کیا۔
