صومالی فضائیہ کے کمانڈر کا پاک فضائیہ کے ہیڈ کوارٹر کا دورہ، ایئر چیف سے ملاقات
باغی ٹی وی کی رپورٹ کے مطابق صومالی فضائیہ کے کمانڈر بریگیڈئیرجنرل محمد شیخ علی نے آج ائیر ہیڈ کوارٹرز اسلام آباد کا دورہ کیا۔
ایئر ہیڈ کوارٹرز آمد پر پاک فضائیہ کے سربراہ ائیر چیف مارشل مجاہد انور خان نے انکا استقبال کیا۔ پاک فضائیہ کے چاق وچوبند دستے نے انہیں سلامی پیش کی۔ بعد ازاں انہوں نے پاک فضائیہ کے سربراہ ائیرچیف مارشل مجاہد انور خان سے انکے آفس میں ملاقات کی۔
پاک فضائیہ کے ترجمان کے مطابق ملاقات میں باہمی دلچسپی اور پیشہ ورانہ امور تبادلہ ء خیال کیاگیا۔صومالی فضائیہ کے کمانڈر نے پاک فضائیہ کی شاندار تاریخ کی تعریف کی اور پاک فضائیہ کی حالیہ عرصے میں جدیدیت اور خود ا نحصاری کی کاوشوں کو سراہا۔ پاک فضائیہ کے سربراہ نے دونوں ممالک کے ما بین بہترین باہمی تعلقات کو مزید تقویت دینے کے لئے صومالیہ کی فضائیہ کو فوجی تربیت میں بھر پور مدد اور تعاون کی پیشکش کی۔
دونوں معزز شخصیات نے دونوں فضائی افواج کے درمیان موجود مثالی باہمی تعاون کو مزید فروغ دینے کے عزم کا اظہار کیا
