سیالکوٹ، (باغی ٹی وی بیوروچیف شاہد ریاض)وزیراعلیٰ پنجاب کے "زیادہ گندم اگاؤ” پروگرام کے تحت ضلع سیالکوٹ کے 14 خوش نصیب کسانوں میں ٹریکٹرز اور 4 کسانوں میں سپر سیڈرز تقسیم کر دیے گئے۔ یہ تقسیم ایک پروقار تقریب میں کی گئی جس میں چیئرمین پنجاب لینڈ ریونیو اتھارٹی چودھری طارق سبحانی، ڈپٹی کمشنر صبا اصغر علی، اراکین صوبائی اسمبلی محمد منشاء اللہ بٹ، چودھری فیصل اکرام، رانا عارف ہرناہ، اور ایم این اے گلناز شجاعت پاشا نے شرکت کی۔
تقریب سے خطاب کرتے ہوئے مہمانوں نے کسانوں کو مبارکباد پیش کی اور کہا کہ وزیراعلیٰ پنجاب کی جامع زرعی اصلاحات سے صوبہ میں زراعت کو فروغ مل رہا ہے۔ انہوں نے کہا کہ کسانوں کو اربوں روپے کے بلا سود قرضے، سبسڈی پر ٹریکٹرز اور زرعی آلات کی فراہمی، نیز کسان کارڈ کے ذریعے ڈیزل، کھاد اور بیج کی مد میں ادائیگیوں سے کاشتکاروں کی مالی مشکلات میں کمی آئی ہے۔ مقررین نے امید ظاہر کی کہ اگر یہ سلسلہ اسی طرح جاری رہا تو نہ صرف کسان خوشحال ہوگا بلکہ "پنجاب خوشحال” کا نعرہ بھی شرمندہ تعبیر ہوگا۔
انہوں نے مزید کہا کہ جدید زرعی آلات کے استعمال سے زرعی پیداوار میں اضافہ ہوگا اور اسموگ جیسے ماحولیاتی مسائل پر بھی قابو پانا ممکن ہوسکے گا۔ تقریب میں زینا ارشد وڑائچ، سابق اقلیتی ایم این اے ڈاکٹر نیلسن عظیم اور ایگریکلچر ڈیپارٹمنٹ کے حکام سمیت کثیر تعداد میں کاشتکاروں نے شرکت کی۔
