میرپور ماتھیلو: گھوٹکی پولیس کی کارروائی، چوری شدہ بھینس اصل مالک کے حوالے
میرپور ماتھیلو،باغی ٹی وی (نامہ نگار مشتاق علی لغاری)گھوٹکی پولیس کی کارروائی، چوری شدہ بھینس اصل مالک کے حوالے
تفصیلات کے مطابق گھوٹکی میں تھانہ اے سیکشن پولیس نے ایک بہترین کارروائی کرتے ہوئے چوری شدہ بھینس برآمد کر کے قانونی کارروائی کے بعد اصل مالک کے حوالے کر دی۔
ایس ایس پی گھوٹکی ڈاکٹر سمیع اللہ سومرو کی ہدایات پر ایس ایچ او تھانہ اے سیکشن گل محمد مہر اور ان کی ٹیم نے کارروائی کرتے ہوئے قادر پور کے علاقے سے چوری شدہ بھینس برآمد کی۔ یاد رہے کہ 24 نومبر 2024 کی رات نامعلوم چوروں نے تھانہ اے سیکشن کی حدود سے خان محمد ولد نور محمد کولاچی کی بھینس چوری کر لی تھی، جس کی رپورٹ متاثرہ شخص نے تھانے میں درج کروائی تھی۔
پولیس ٹیم نے آرمی پبلک اسکول کے قریب سے چوری شدہ بھینس کی تلاش شروع کی اور کامیاب کارروائی کے بعد اسے بازیاب کر لیا۔ قانونی کارروائی مکمل ہونے کے بعد بھینس اصل مالک خان محمد کولاچی کے حوالے کر دی گئی۔
مسروقہ بھینس کی واپسی پر مالک نے گھوٹکی پولیس کی کارکردگی کو سراہا اور ایس ایس پی ڈاکٹر سمیع اللہ سومرو اور ایس ایچ او گل محمد مہر کا شکریہ ادا کیا۔
ایس ایس پی گھوٹکی نے پولیس ٹیم کی محنت اور کامیاب کارروائی پر شاباشی کا پیغام دیتے ہوئے ان کی کارکردگی کو سراہا۔ یہ کارروائی گھوٹکی پولیس کی عوامی مسائل کے حل میں ذمہ داری اور مستعدی کی عکاسی کرتی ہے۔
