اوچ شریف: سوئی گیس ناردرن بائی پاس،غلط منصوبہ بندی اور ناقص تعمیر نے جانوں کو خطرے میں ڈال دیا

اوچ شریف (باغی ٹی وی ،نامہ نگارحبیب خان)سوئی گیس ناردرن بائی پاس،عباسیہ کینال ایکسپریس روڈ،غلط منصوبہ بندی،ناقص تعمیر،قیمتی انسانی جانوں کو خطرے میں ڈال دیا

تفصیل کے مطابق اوچ شریف میں سوئی گیس ناردرن قومی شاہراہ بائی پاس عباسیہ کینال جلال پور پیر والا ایکسپریس روڈ پر غلط منصوبہ بندی اور ناقص تعمیراتی معیار کی وجہ سے ٹریفک حادثات میں تشویش ناک اضافہ دیکھنے میں آ رہا ہے۔

گزشتہ روز ایک ٹریلر ڈھلوان پر قابو نہ رکھتے ہوئے الٹ گیا جس کے نتیجے میں سڑک پر گاڑیوں کی لمبی قطاریں لگ گئیں۔ مقامی شہریوں نے اس واقعہ پر شدید تشویش کا اظہار کرتے ہوئے الزام عائد کیا ہے کہ سڑک کی تعمیر کے دوران حفاظتی معیار کی پاسداری نہیں کی گئی۔ ان کا کہنا ہے کہ سڑک کی ڈھلوانوں کی تعمیر میں بے ضابطگیوں نے سڑک کو غیر محفوظ بنا دیا ہے۔

شہریوں نے مطالبہ کیا ہے کہ حکام فوری طور پر سڑک کی مرمت کریں، حفاظتی اقدامات کو یقینی بنائیں اور بہتر ڈیزائن کی منصوبہ بندی کریں تاکہ مستقبل میں مزید انسانی نقصانات سے بچا جا سکے۔