سکھر (باغی ٹی وی، نامہ نگار مشتاق علی لغاری)ڈی آئی جی سکھر رینج کیپٹن (ر) فیصل عبداللہ چاچڑ کی زیر صدارت محرم الحرام 1446ھ کے سلسلے میں اہلِ تشیع علماء، اکابرین اور رہنماؤں کے ساتھ ڈی آئی جی آفس کانفرنس ہال میں اہم اجلاس منعقد ہوا، جس میں سکھر، خیرپور اور گھوٹکی کے اضلاع سے نمائندگان نے شرکت کی۔
اجلاس کا آغاز تلاوتِ کلامِ پاک سے ہوا، جس کے بعد محرم کے دوران منعقدہ مجالس و جلوسوں کی سیکیورٹی، امن و امان، اور ممکنہ خطرات سے نمٹنے کے لیے تفصیلی حکمت عملی پر تبادلہ خیال کیا گیا۔ ڈی آئی جی فیصل چاچڑ نے سابقہ تجربات کی روشنی میں سیکیورٹی انتظامات کا ازسرِ نو جائزہ لیا اور شرکاء سے انفرادی طور پر مسائل دریافت کیے۔
ڈی آئی جی سکھر نے کہا کہ محرم الحرام کے دوران فول پروف سیکیورٹی پلان کو حتمی شکل دی جا رہی ہے۔ تمام امام بارگاہوں پر سینئر پولیس افسران کی نگرانی میں سخت سیکیورٹی انتظامات کیے جائیں گے۔ جلوسوں کی روٹس پر سویپنگ، سرچنگ، اور نیشنل ایکشن پلان کے تحت سخت نگرانی کی جائے گی۔ مرد و خواتین رضا کاروں کو تربیت دے کر پولیس کے ساتھ سیکیورٹی ڈیوٹی پر تعینات کیا جائے گا، جبکہ خواتین کی مجالس میں لیڈی پولیس اہلکاروں کی خصوصی تعیناتی بھی عمل میں لائی جائے گی۔
انہوں نے مزید کہا کہ کسی بھی ہنگامی صورتحال سے نمٹنے کے لیے ریپڈ رسپانس فورس کی خصوصی ٹیمیں ہر وقت موجود ہوں گی، اور شرپسند عناصر کے خلاف بلا امتیاز کارروائی عمل میں لائی جائے گی۔ شکایات اور معلومات کے بروقت تبادلے کے لیے کنٹرول روم بھی قائم کر دیا گیا ہے۔
اجلاس کے اختتام پر شرکاء نے ڈی آئی جی پر مکمل اعتماد اور تعاون کا اظہار کرتے ہوئے بین المذاہب ہم آہنگی اور امن کے فروغ کے لیے دعا کی۔ بعد ازاں ڈی آئی جی سکھر نے سکھر رینج کے تینوں اضلاع کے ڈی آئی بی انچارجز کو سیکیورٹی پلان پر سختی سے عملدرآمد اور کسی بھی قسم کی کوتاہی پر سخت محکمانہ کارروائی کی ہدایات جاری کیں۔
