سکھر (باغی ٹی وی،نامہ نگارمشتاق علی لغاری)یومِ دفاع پاکستان کے موقع پر لبِ مہران کے قریب واکنگ ٹریک پر پرچم کشائی کی پروقار تقریب منعقد ہوئی۔ تقریب میں میرِ سکھر بیرسٹر ارسلان شیخ، کمشنر سکھر عابد سلیم قریشی، ڈی آئی جی سکھر رینج کیپٹن (ر) فیصل عبداللہ چاچڑ، ایس ایس پی سکھر اظہر خان مغل اور ڈپٹی کمشنر نادر شہزاد خان نے خصوصی شرکت کی۔
ضلعی انتظامیہ کی جانب سے منعقدہ اس تقریب میں دفاعِ وطن کی بے مثال تاریخ کو یاد کیا گیا۔ اس موقع پر ملک کا دوسرا اور سندھ کا پہلا 84 فٹ بلند اور 56 فٹ چوڑا پرچم لہرایا گیا، جس پر شرکاء نے زبردست جوش و خروش کا مظاہرہ کیا۔
تقریب کے اختتام پر ملکی سلامتی، ترقی اور خوشحالی کے لیے خصوصی دعائیں کی گئیں جبکہ شہداء کو خراجِ عقیدت پیش کیا گیا اور افواجِ پاکستان کی خدمات کو سراہا گیا۔ شرکاء نے اس عزم کا اظہار کیا کہ ملک و قوم کی خدمت میں ہمیشہ بھرپور کردار ادا کرتے رہیں گے۔
اس موقع پر کالج کے اساتذہ، طلباء و طالبات، سول سوسائٹی کے معززین اور بری، بحری و فضائیہ سمیت دیگر فورسز کے افسران کی بڑی تعداد بھی موجود تھی۔
