سیالکوٹ،باغی ٹی وی (بیوروچیف شاہدریاض) 16 سال سے مطلوب خطرناک اشتہاری ملزم انٹرپول کے ذریعے کروشیا سے گرفتار
سیالکوٹ کے تھانہ اگوکی کو 16 سال سے مطلوب خطرناک اشتہاری ملزم کو انٹرپول کے ذریعے کروشیا سے گرفتار کر لیا گیا ہے۔ ملزم کی شناخت افتخار احمد کے نام سے ہوئی ہے اور اسے ڈکیتی کے ایک مقدمے میں مطلوب تھا۔
ایف آئی اے این سی بی انٹرپول نے ملزم کی گرفتاری کے لیے ریڈ نوٹس جاری کیا تھا۔ ملزم کو کروشیا سے گرفتار کر کے اسلام آباد ائیرپورٹ منتقل کیا گیا ہے۔
گرفتار ملزم 16 سال سے پنجاب پولیس کو مطلوب تھا۔ ملزم کے خلاف تھانہ اگوکی، سیالکوٹ میں مقدمہ درج تھا۔ ملزم نے سال 2008 میں دیگر ساتھیوں کے ساتھ مل کر ایک شہری کے گھر ڈکیتی کی واردات کی تھی۔
ملزم کو بعد ازاں ایف آئی اے امیگریشن اسلام آباد نے پنجاب پولیس حکام کے حوالے کر دیا۔ ملزمان کی حوالگی انٹرپول اسلام آباد کی انٹرپول کروشیا کے ساتھ قریبی رابطہ کاری کی وجہ سے ممکن ہوئی۔
جدید ٹیکنالوجی سے آراستہ این سی بی انٹرپول 24/7 پوری دنیا کے ساتھ رابطے میں ہے۔ ملزمان کی گرفتاری کے لئے تمام تر وسائل کو بروئے کار لایا جا رہا ہے۔
