پاکستان کی سیکیورٹی فورسز نے ضلع کرک میں انٹیلی جنس بیسڈ آپریشن کے دوران 6 خارجیوں کو ہلاک کر دیا۔ پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق یہ آپریشن خوارج کی موجودگی کی اطلاع ملنے پر کیا گیا۔
آئی ایس پی آر کے مطابق، آپریشن کے دوران سیکیورٹی فورسز نے مؤثر انداز میں خارجیوں کے ٹھکانے کو نشانہ بنایا، جس کے نتیجے میں 6 خارجی ہلاک ہو گئے۔ اس وقت آپریشن جاری ہے اور اس کا مقصد علاقے میں باقی ماندہ خارجیوں کا خاتمہ کرنا ہے۔پاکستان کی سیکیورٹی فورسز کی جانب سے یہ بھی کہا گیا ہے کہ وہ ملک سے دہشت گردی کی لعنت کا مکمل خاتمہ کرنے کے لیے پرعزم ہیں اور اپنے عزم میں کسی قسم کی کمی نہیں آنے دیں گے۔
وزیراعظم کا سیکیورٹی فورسز کو خراج تحسین
وزیراعظم محمد شہباز شریف نے ضلع کرک میں کامیاب آپریشن اور 6 خارجیوں کی ہلاکت پر سیکیورٹی فورسز کو خراج تحسین پیش کیا۔ وزیراعظم نے کہا کہ "انسانیت کے دشمنوں کے مذموم عزائم کو اسی طرح خاک میں ملاتے رہیں گے۔”انہوں نے مزید کہا کہ "دہشت گردی کے خلاف جنگ میں اپنی جانیں قربان کرنے والے قوم کے بیٹوں کی قربانیاں ہرگز رائیگاں نہیں جائیں گی۔” وزیراعظم نے یہ بھی یقین دہانی کرائی کہ سیکیورٹی فورسز ملک سے دہشت گردی کا مکمل خاتمہ کرنے کے لیے سرگرم عمل ہیں اور اس میں کوئی کسر باقی نہیں رہنے دی جائے گی۔
اس کامیاب آپریشن نے دہشت گردوں کے خلاف سیکیورٹی فورسز کی عزم اور صلاحیت کو ثابت کیا ہے اور ملک میں امن کے قیام کے لیے ان کی مسلسل کوششوں کو مزید مستحکم کیا ہے۔
