کراچی: کراچی کی وفاقی اینٹی کرپشن عدالت نے سابق وزیراعظم یوسف رضا گیلانی کو ٹڈاپ کرپشن اسکینڈل کے تین مقدمات میں بری کر دیا۔
کراچی کی وفاقی اینٹی کرپشن کورٹ میں ٹڈاپ کرپشن اسکینڈل کیس کی سماعت ہوئی، جس میں سابق وزیراعظم یوسف رضا گیلانی عدالت میں پیش ہوئے۔ عدالت نے تمام دلائل اور گواہیوں کا جائزہ لینے کے بعد یوسف رضا گیلانی کو تین مقدمات میں بری کرنے کا فیصلہ سنایا۔
ہمارے لیے جیل نئی بات نہیں ہے، چاہیں تو مجھے پھانسی دے دیں،چیئرمین سینیٹ کا جج سے مکالمہ
ٹڈاپ کرپشن کیس کی سماعت کے دوران چیئرمین سینیٹ یوسف رضا گیلانی اور جج وفاقی انسداد کرپشن عدالت کے درمیان دلچسپ مکالمہ بھی ہوا،چیئرمین سینیٹ یوسف رضا گیلانی کے خلاف ٹڈاپ کرپشن اسکینڈل کی سماعت اینٹی کرپشن کورٹ کراچی میں ہوئی،دوران سماعت عدالت نے یوسف رضا گیلانی سے استفسار کیا آپ کس جیل میں جانا چاہیں گے، کراچی، ملتان یا اسلام آباد، جس پر یوسف رضا گیلانی کا کہنا تھا مجھے جیل سے کوئی ڈر نہیں، ہمارے لیے جیل نئی بات نہیں ہے، چاہیں تو مجھے پھانسی دے دیں، چیئرمین سینیٹ کے جواب پر اینٹی کرپشن عدالت کے جج مسکرا دیے۔عدالت نے سوال کیا آپ کو گھر کی جیل کیوں پسند نہیں؟ جس پر یوسف رضا گیلانی نے کہا میرا آبائی گھر ملتان ہے، فیملی لاہور اور سینیٹ آفس اسلام آباد ہے،بعد ازاں وفاقی اینٹی کرپشن کورٹ کے جج نے کہا گیلانی صاحب، آپ پر کوئی الزام ثابت نہیں ہوا لہذا آپ باعزت بری ہیں جبکہ آپ کے خلاف بیان دینے والے اب اس کیس میں ملزم بن گئے ہیں۔
یاد رہے کہ یہ مقدمات فریٹ سبسڈی کی مد میں قومی خزانے کو 6 ارب روپے سے زائد نقصان پہنچانے کے الزامات پر تھے۔ ان الزامات میں کہا گیا تھا کہ ملزمان نے فریٹ سبسڈی کے ذریعے قومی خزانے کو بڑا نقصان پہنچایا۔ٹڈاپ کرپشن اسکینڈل میں مجموعی طور پر 70 سے زائد مقدمات 2013 میں درج کیے گئے تھے، جن میں کئی کمپنیوں اور افراد کو نامزد کیا گیا تھا۔ اس اسکینڈل میں پیپلز پارٹی کے مرحوم رہنما مخدوم امین فہیم کا بھی نام شامل تھا، جنہیں الزام کا سامنا تھا۔
یوسف رضا گیلانی کو بری کرنے کے فیصلے کے بعد ان کے حامیوں نے فیصلے کو خوش آئند قرار دیتے ہوئے کہا کہ یہ فیصلہ انصاف کی جیت ہے۔
