تلہ گنگ (باغی ٹی وی، ملک محمد مزمل اقبال) تلہ گنگ میں ادبی تاریخ رقم آل پاکستان رائٹرز ویلفیئر ایسوسی ایشن (اپووا) کے ضلعی دفتر کا باقاعدہ افتتاح، فیضان شیخ ضلعی کوآرڈینیٹر مقرر
علم و ادب کے فروغ کے لیے سرگرم ملک گیر تنظیم آل پاکستان رائٹرز ویلفیئر ایسوسی ایشن (اپووا) نے ضلع چکوال و تلہ گنگ میں اپنی باقاعدہ موجودگی کا آغاز کر دیا۔ گزشتہ روز تلہ گنگ میں اپووا کے ضلعی دفتر کا باوقار افتتاحی پروگرام منعقد ہوا، جس میں لاہور سے آئے اپووا کے مرکزی وفد کے علاوہ تلہ گنگ کے ممتاز صحافیوں، ادیبوں، شاعروں، سماجی شخصیات اور اہلِ قلم نے بھرپور شرکت کی۔
تقریب کے دوران سینئر صحافی فیضان شیخ کو اپووا ضلع تلہ گنگ و چکوال کا ضلعی کوآرڈینیٹر مقرر کیا گیا، جس کا باقاعدہ نوٹیفکیشن بھی جاری کیا گیا۔ اس اقدام کو علمی و ادبی حلقوں کی جانب سے سراہا گیا اور مستقبل میں اپووا کے متحرک کردار کی توقعات وابستہ کی گئیں۔
افتتاحی تقریب میں اپووا کی مرکزی قیادت نے شرکت کی جن میں سینئر وائس چیئرمین ملک یعقوب اعوان، بانی صدر ایم ایم علی، نائب صدور حافظ محمد زاہد اور سفیان علی فاروقی، محمد اسلم سیال، ایڈیٹر باغی ٹی وی ممتاز حیدراعوان اور محمد بلال شامل تھے۔ ان معزز شخصیات نے فیضان شیخ کی تعیناتی پر مبارکباد دیتے ہوئے اپووا کے مشن اور ویژن پر روشنی ڈالی۔
تقریب میں تلہ گنگ و چکوال کی علمی و صحافتی دنیا کی نامور شخصیات نے شرکت کی، جن میں چیئرمین تلہ گنگ پریس کلب محمد افضل اعوان، سرپرست اعلیٰ پریس کلب چوہدری غلام ربانی، معروف شاعر محمد بن اکبر، صدر تحصیل پریس کلب شیخ فاروق جھاٹلہ، جنرل سیکرٹری ارشد اعوان مرجان، سینئر صحافی راجہ محمد عدیل، تحصیل اسپورٹس آفیسر و مصنف ملک طارق محمود، معروف صحافی محسن شیخ (جنگ/جیو)، سینئر صحافی عمران سرور جبی، 24 نیوز کے نمائندہ ملک ارشد کوٹگلہ، پی ٹی وی کے نمائندہ چوہدری نذر، شاعر و مصنف ظہیر احمد، نوجوان شاعر سدیم عارض، باغی ٹی وی کے نمائندہ ملک مزمل اقبال، تلہ گنگ ٹائمز کے نمائندہ بلال شیخ، ارسلان رفیق، حافظ مقبول حسن و دیگر شخصیات شامل تھیں۔
اس موقع پر خطاب کرتے ہوئے ملک یعقوب اعوان نے کہا کہ”اپووا لکھاریوں، شاعروں، صحافیوں اور اہلِ قلم کی نمائندہ تنظیم ہے۔ تلہ گنگ میں دفتر کا قیام ایک تاریخی قدم ہے۔ ہم ادب، تحقیق اور فن کی خدمت جاری رکھیں گے۔”
بانی صدر ایم ایم علی نے کہاکہ”اپووا جونیئرز کی تربیت اور سینئرز کو خراجِ تحسین پیش کرنے کے مشن پر کاربند ہے۔ ہر ضلع میں ہماری تنظیم کا مضبوط اور فعال نیٹ ورک قائم کیا جائے گا تاکہ اہلِ قلم کو ایک پلیٹ فارم میسر آ سکے۔”
آخر میں فیضان شیخ نے اپووا کی قیادت اور معزز مہمانوں کا شکریہ ادا کرتے ہوئے اس عزم کا اظہار کیا کہ وہ تلہ گنگ و چکوال کے لکھاریوں، ادیبوں اور صحافیوں کو اپووا کے پلیٹ فارم سے یکجا کر کے ایک مضبوط ادبی و فکری تحریک کو فروغ دیں گے۔
