تلہ گنگ،باغی ٹی وی (شوکت علی ملک) گورنمنٹ پوسٹ گریجویٹ کالج کے طلباء کی ایتھلیٹکس میں شاندار کامیابی، ڈسٹرکٹ چیمپئن شپ میں کلین سویپ
تفصیل کے مطابق گورنمنٹ پوسٹ گریجویٹ کالج تلہ گنگ کے طلباء نے سالانہ ڈسٹرکٹ ایتھلیٹکس چیمپئن شپ 2024 میں 91 پوائنٹس کے ساتھ میدان مار لیا، حیدر علی 26 پوائنٹس کے ساتھ "ڈسٹرکٹ چکوال کے بیسٹ ایتھلیٹ” قرار پائے۔
چیمپئن شپ، جو ہائیر ایجوکیشن ڈیپارٹمنٹ کے زیراہتمام منعقد ہوئی، میں تلہ گنگ کالج کے طلباء نے مختلف مقابلوں میں نمایاں کارکردگی دکھائی۔ نمایاں پوزیشن حاصل کرنے والوں میں محمد رقیب، محمد عادل، احمد عباس، عدنان شفیق، عکرمہ، حسن، حسنین، اور شاہ زیب شامل ہیں۔
کالج کے کوچ پروفیسر جاوید اقبال ملک نے 30 سالہ کیریئر کے دوران اپنے ایتھلیٹس کی شاندار تربیت سے تلہ گنگ کا نام بلند رکھا۔ ان کی کوچنگ کے دوران چکوال میں تلہ گنگ کے ایتھلیٹس ہمیشہ سرفہرست رہے، جو ایک منفرد اعزاز ہے۔ یاد رہے کہ پروفیسر جاوید اگلے سال 14 اگست 2025 کو ریٹائر ہو رہے ہیں، اور ان کی خدمات کو کالج کے لیے بے حد قابل ستائش قرار دیا جا رہا ہے۔
کامیابی پر کالج کے پرنسپل پروفیسر ڈاکٹر بشیر منصور، پروفیسر جاوید اقبال ملک، اور تمام اساتذہ نے جیتنے والے طلباء کو مبارکباد دیتے ہوئے کہا کہ یہ نہ صرف کالج بلکہ ضلع تلہ گنگ کے لیے بھی ایک بڑا اعزاز ہے۔
