فریال تالپور بھی عید گزاریں گی اڈیالہ جیل

سابق صدر آصف زرداری کی ہمشیرہ فریال تالپور کو 19 اگست تک جوڈیشل ریمانڈ پر بھجوا دیا گیا

باغی ٹی وی کی رپورٹ کے مطابق فریال تالپور کو 19 اگست تک جوڈیشل ریمانڈ پر جیل بھجوا دیا گیا، اسلام آباد کی احتساب عدالت کے ڈیوٹی جج طاھر محمود نے جعلی اکاؤنٹس ریفرنس کی سماعت کی۔ فریال تالپور طبیعت کی ناسازی کی وجہ سے پولی کلینک اسپتال میں داخل ہونے کے باعث عدالت میں پیش نہ پو سکیں

۔نیب کے تفتیشی افسر محمد علی ابڑو عدالت میں فریال تالپور سے ہونے والی تفتیش کی رپورٹ اور میڈیکل سرٹیفکیٹ عدالت میں پیش کیا۔ نیب پراسیکیوٹر نے مؤقف اپنایا کہ ڈاکٹروں کے مطابق طبیعت بہتر نہ ہونے کے باعث فریال تالپور کو سفر کی اجازت نہیں دے سکتے اس لئے ہمارے لئے فریال تالپور کو عدالت لانا ممکن نہیں۔

نیب پراسیکیوٹر نے احتساب عدالت سے فریال تالپور کو جوڈیشل ریمانڈ پر جیل بھیجنے کی استدعا کی اور کہا کہ فریال تالپور سے تفتیش مکمل کر لی گئی ہے اس لئے عدالت ملزمہ کو جیل بھیج دے۔

عدالت نے فریال تالپور کا جوڈیشل ریمانڈ دے دیا، فریال تالپور کو اڈیالہ جیل منتقل کیا جائے گا.

واضح رہے کہ جعلی اکاونٹس کیس میں اسلام آباد ہائیکورٹ سے ضمانت مسترد ہونے پر فریال تالپور کو نیب نے گرفتار کیا ہے، آصف زرداری کو بھی نیب نے گرفتار کر رکھا ہے وہ بھی نیب کی تحویل میں ہیں.