کوئٹہ (آغا نیاز مگسی) ڈپٹی کمشنر لسبیلہ حمیرا بلوچ نے ضلع لسبیلہ میں ٹمبر مافیا کے خلاف سخت کارروائی کرنے کے احکامات جاری کر دیئے جس کی تعمیل کرتے ہوئے ایڈیشنل ڈپٹی کمشنر لسبیلہ سید یاسین اختر نے ڈپٹی کنزرویٹر محکمہ جنگلات لسبیلہ خلیل الرحمان کھوسہ کے ہمراہ تحصیل لاکھڑا اور تحصیل لیاری میں ٹمبر مافیا کے بڑے بٍڑے ٹالز پر چھاپہ مار کارروائی کرکے متعدد ٹالز کو سیل کردیا.
ایڈیشنل ڈپٹی کمشنر لسبیلہ نے ڈپٹی کنزرویٹر کو ہدایت دی کہ ٹمبر مافیا کے خلاف سخت کاروائی کرکے بھاری جرمانے عائد کیے جائیں اور ٹال مالکان کے خلاف ایف آئی آر درج کی جائے۔ اس موقع پر ایڈیشنل ڈپٹی کمشنر لسبیلہ سید یاسین اختر نے کہا کہ حکام بالا کی طرف سے سختی سے ہدایت کی گئی ہے کہ ضلع لسبیلہ میں غیر قانونی طور پر قیمتی درختوں کی کٹائی کو روکا جائے جس پر ڈپٹی کمشنر لسبیلہ کے حکم پر تحصیل لاکھڑا اور تحصیل لیاری میں غیر قانونی طور پر جنگلات اور قیمتی درختوں کی کٹائی کے خلاف کاروائی کی گئی ہے انہوں نے کہا کہ غیر قانونی طور پر درختوں اور جنگلات کی کٹائی میں ملوث ٹمبر مافیا کے خلاف سخت کاروائی کرکے پابند سلاسل کیا جائے گا اگر کوئی زمیندار کاشتکاری کے لئے اپنی زمین صاف کرنا چاہتا ہے تو ضلعی انتظامیہ سے اجازت نامہ لینا ضروری ہوگا اگر کوئی زمیندار اپنی زمین ضلعی انتظامیہ سے اجازت لیے بغیر درخت کاٹے گا اس زمیندار کے خلاف بھی سخت کاروائی کی جائے گی۔ اس موقع پر ایس ایچ او لیاری قادر بخش اور اہس ایچ او لاکھڑا غلام اکبر شیخ، نائب رسالدار عبدالستار صائم لیویز اور پولیس کی بھاری نفری موجود تھی۔
Leave a reply
