سیالکوٹ (باغی ٹی وی، بیوروچیف شاہد ریاض)سیالکوٹ پولیس نے تھانہ سمبڑیال کے علاقے کوٹ دڑا سے اغوا ہونے والی 6 سالہ کمسن بچی طیبہ کو ضلع وہاڑی سے بحفاظت بازیاب کرا لیا ہے، جب کہ اغوا میں ملوث میاں بیوی اجمل اور رانی کو بھی گرفتار کر لیا گیا ہے۔ پولیس کی یہ کامیابی پیشہ ورانہ مہارت، جدید ٹیکنالوجی اور بروقت کارروائی کا نتیجہ ہے۔
تفصیلات کے مطابق بچی کے والد غلام قادر نے تھانہ سمبڑیال میں رپورٹ درج کروائی تھی کہ اس کی بیٹی طیبہ کو محلے میں کرایہ پر رہائش پذیر ایک جوڑا اغوا کر کے لے گیا ہے۔ شکایت کے فوری بعد ڈسٹرکٹ پولیس آفیسر سیالکوٹ، فیصل شہزاد نے واقعہ کا نوٹس لیتے ہوئے ڈی ایس پی سمبڑیال کو ہدایت کی کہ بچی کو ہر صورت بحفاظت بازیاب کرایا جائے۔
ایس ایچ او تھانہ سمبڑیال انسپکٹر ارشاد کی سربراہی میں پولیس ٹیم نے تفتیش کا آغاز کیا اور ٹیکنیکل ٹریسنگ کے ذریعے ملزمان کا پتہ چلا کر ضلع وہاڑی سے بچی کو بحفاظت بازیاب کروا لیا۔ ابتدائی تفتیش سے معلوم ہوا کہ ملزمان نے طیبہ کو والد سے چند روز قبل پیش آئے معمولی جھگڑے کی رنجش کی بنیاد پر اغوا کیا اور اُسے کراچی لے جانے کا ارادہ رکھتے تھے۔
پولیس نے دونوں ملزمان کو گرفتار کر کے ان کے خلاف قانونی کارروائی شروع کر دی ہے۔ واقعے کے بعد اہلِ علاقہ نے پولیس کی فوری کارروائی اور کامیابی کو سراہتے ہوئے خراجِ تحسین پیش کیا۔ ڈی پی او فیصل شہزاد نے پولیس ٹیم کو شاباش دیتے ہوئے کہا کہ بچوں کا تحفظ پولیس کی اولین ترجیح ہے، اور اس معاملے میں کسی قسم کی غفلت ہرگز برداشت نہیں کی جائے گی۔
