تحریک عدم اعتماد کے دوران فوج غیر جانبدار تھی،رانا ثناء اللہ

تحریک عدم اعتماد کے دوران فوج غیر جانب دار تھی، اسی لیے بانی پی ٹی آئی نے یہ نعرہ لگایا تھا کہ نیوٹرل تو جانور ہوتا ہے۔ انہوں نے کہا کہ جنرل باجوہ نے ہم سے یہ کہا تھا کہ تحریک عدم اعتماد واپس لے لیں تو بانی پی ٹی آئی نئے الیکشن کرا دیں گے،اُن کا کہنا تھا کہ خدا کی قسم مولانا فضل الرحمان نے دلائل دیے کہ بانی پی ٹی آئی یہودی لابی کا ایجنٹ ہے، یہ ملک تباہ کر دے گا ،، ن لیگی رہنما نے کہا کہ مولانا فضل الرحمان نے کہا کہ ہم عدم اعتماد واپس نہیں لیں گے، حکومت سنبھالنے کے بعد جب ہر چیز سامنے آنے لگی تو ہم نے فیصلہ کیا کہ اسمبلی توڑ دیں گے اور الیکشن میں جائیں گے۔رانا ثناء اللّٰہ نے کہا کہ اس کے بعد اب مولانا فضل الرحمان ایسی باتیں کر رہے ہیں، جے یو آئی قائد نے دراصل الیکشن نتائج کی فرسٹریشن میں ایسی گفتگو کی، جو اُن کے منصب کو زیب نہیں دیتی۔
ان کا کہنا تھا کہ اب مولانا کہتے ہیں جنرل فیض نہیں کچھ اور اشخاص تھے، بتائیں وہ کون تھے؟ مولانا ریٹائر شخص کا نام لے رہے ہیں کسی اور کا نام لینے کی ہمت نہیں ہو رہی۔ ن لیگی رہنما نے مزید کہا کہ فضل الرحمان میرے لیے قابل احترام ہیں مگر انہوں نے اپنے آپ سے زیادتی کی ہے، انہوں نے حقائق کے برعکس بات کی، وہ عالم دین ہیں، اُن سے متعلق کیا بات کروں۔انہوں نے کہا کہ یہ کیا بات ہوئی کہ جو شخص ریٹائر ہوا سارا ملبہ اس پر ڈال دیں، جنرل باجوہ یا جنرل فیض سے میری کوئی ہمدردی نہیں۔ن لیگی رہنما نے کہا کہ 16 ماہ میں جو مہنگائی ہوئی اس سے ہمیں سیاسی نقصان ہوا ہے، ملک کو اس دلدل سے نکالنے کےلیے تیار ہیں، اس کا جو بھی نتیجہ نکلے، جو ہونا ہے وہ ہمیں نظر آرہا ہے کچھ ابہام نہیں۔