تحصیل ہیڈکوارٹر خوشاب میں سستے دستر خوان کا افتتاح کر دیا گیا

انجمن بہبودِ مریضاں خوشاب کے زیر اہتمام تحصیل ہیڈ کوارٹر ہسپتال خوشاب میں مریضوں اور اُن کے لواحقین کی سہولت کیلئے سستے دستر خوان کا افتتاح کر دیا گیا۔ افتتاحی تقریب میں قومی اسمبلی کی رُکن محترمہ جویریہ آہیر نے بطور مہمانِ خصوصی شرکت کی۔ اس موقع پر تحصیل ہیڈ کوارٹر ہسپتال خوشاب کے ایم ایس سمیت میڈیکل و نرسنگ سٹاف کے علاوہ مریضوں کے لواحقین کی بھی بڑی تعداد موجود تھی۔

محترمہ جویریہ آہیر نے دستر خوان کا حسب ضابطہ افتتاح کیا۔ تقریب سے خطاب کرتے ہوئے اُنھوں نے کہا کہ ہسپتال میں زیر علاج مریضوں اور اُن کے لواحقین کو سہولیات مہیا کرنے کیلئے انجمن بہبودِ مریضاں کا کردار لائق تحسین ہے۔ اُنھوں نے انجمن بہبودِ مریضاں کی معاونت کرنے والی مخیر شخصیات کو بھی خراجِ تحسین پیش کیا اور توقع ظاہر کی کہ یہ سلسلہ ضلع خوشاب کے تمام سرکاری ہسپتالوں تک پھیلا دیا جائے گا۔