ٹھٹھہ :پولیس کی کامیاب کارروائی، 6 بین الاضلاعی کریمنل گینگز کے 19 ارکان گرفتار

ٹھٹھہ،باغی ٹی وی (نامہ نگاربلاول سموں کی رپورٹ )پولیس کی کامیاب کارروائی، 6 بین الاضلاعی کریمنل گینگز کے 19 ارکان گرفتار

تفصیل کے مطابق ٹھٹھہ پولیس نے جرائم پیشہ افراد کے خلاف کامیاب کارروائیاں کرتے ہوئے 6 بین الاقوامی کرمنل گینگز کو بکھیر دیا ہے۔ پولیس نے 19 خطرناک مجرموں کو گرفتار کیا ہے اور ان کے قبضے سے چھینی گئی املاک سمیت اسلحہ بھی برآمد کیا ہے۔

ایس ایس پی ٹھٹھہ ڈاکٹر محمد عمران خان نے پولیس اسٹیشن دھابیجی میں پریس بریفنگ کے دوران بتایا کہ انہوں نے جرائم کے خلاف سخت کارروائی کا حکم دیا تھا جس کے نتیجے میں یہ کامیابی حاصل ہوئی ہے۔ ایس ڈی پی او ساکرو، واجد تھہیم کی زیرِ نگرانی پولیس ٹیم نے مختلف علاقوں میں کارروائیاں کرکے مجرموں کو گرفتار کیا ہے۔

گرفتار مجرموں میں ایاز چانڈیو، علی شاہ، سہیل آرائیں، عبداللہ بھٹ، دولت خان پٹھان، نثار شیدی، نبیل بھٹی، فرحان ملاح اور دیگر شامل ہیں۔

پولیس نے ان کے قبضے سے 2 مزدا ٹرک، 2 بھینسیں، 1 الٹس کار، 8 موبائل فونز، 11 موٹر سائیکلیں، 1 کلاشنکوف، 5 پستول اور گولیاں برآمد کی ہیں۔

ابتدائی تحقیقات سے پتہ چلا ہے کہ یہ گینگز ضلع ٹھٹھہ سمیت کراچی کے مختلف علاقوں میں ڈکیتی، چوری اور گاڑیاں چرانے جیسے جرائم میں ملوث تھے۔ پولیس نے گرفتار مجرموں کو مزید تفتیش کے لیے اپنی تحویل میں لے لیا ہے۔

ایس ایس پی ٹھٹھہ نے پولیس ٹیم کو ان کی کامیابی پر مبارکباد دی اور انہیں تعریفی سرٹیفکیٹ دینے کا اعلان کیا۔