ٹھٹھہ: امن و امان کی بحالی کے لیے ضلع بھر میں پولیس کا سرچ آپریشن
ٹھٹھہ (باغی ٹی وی،نامہ نگار بلاول سموں) ایس ایس پی ٹھٹھہ ڈاکٹر محمد عمران خان کی ہدایت پر ضلع بھر میں امن و امان کی فضا برقرار رکھنے کے لیے پولیس کی جانب سے سرچ اینڈ کومبنگ آپریشن کا انعقاد کیا گیا۔ یہ کارروائی آئی جی پی سندھ غلام نبی میمن اور ڈی آئی جی پی حیدرآباد رینج طارق رزاق دہاریجو کے احکامات کی روشنی میں کی گئی۔
آپریشن کے دوران ایس ڈی پی اوز کی نگرانی میں ہوٹلوں، مسافرخانوں اور متعدد گاڑیوں کی تلاشی لی گئی، جبکہ مشکوک افراد کی جدید ٹیکنیکل سسٹم CRI اور تلاش سافٹ ویئر کے تحت تصدیق کی گئی۔ اس موقع پر ایس ایس پی ٹھٹھہ نے کہا کہ ضلع میں امن و امان کو برقرار رکھنے کے لیے مسلسل سرچ اینڈ کومبنگ آپریشن اور ناکہ بندی کی جا رہی ہے۔
پولیس نے عوام کو ہدایت کی کہ اگر انہیں کسی بھی مشکوک شخص یا سرگرمی کی اطلاع ملے تو فوری طور پر پولیس کو اطلاع دیں تاکہ کسی بھی ناخوشگوار واقعہ سے بروقت نمٹا جا سکے۔ ایس ایس پی ٹھٹھہ نے مزید کہا کہ قانون کی بالادستی اور عوام کی جان و مال کی حفاظت کو یقینی بنانے کے لیے جرائم پیشہ عناصر کے خلاف بلا تفریق کارروائیاں جاری رہیں گی۔
